अभिनेते आशीष वारंग यांचे निधन
सकाळ वृत्तसेवा
ठाणे, ता. ५ : हिंदी तसेच मराठी चित्रपटात भूमिका बजावणारे अभिनेते आशीष वारंग यांचे शुक्रवारी (ता. ५) उपचारादरम्यान खासगी रुग्णालयात निधन झाले. ते ५५ वर्षांचे होते. मागील काही दिवसांपासून ते आजारी होते. त्यांच्या पश्चात आई, पत्नी, एक मुलगा आणि भाऊ असा परिवार आहे.
वर्तकनगर भागात आशीष वारंग हे वास्तव्यास होते. आशीष यांना गेल्या वर्षी कावीळ झाली होती. त्यानंतर त्यांच्या तब्येतीत चढ-उतार सुरू होते, त्यातच त्यांचे शुक्रवारी निधन झाले. बॉलीवूडमध्ये गाजलेल्या चित्रपटात आशीष यांनी आपल्या छोटेखानी भूमिकांनी कायम छाप सोडली. त्यांनी शिस्त, वक्तशीरपणा, प्रेमळ स्वभाव यामुळे बॉलीवूडमधील रोहित शेट्टी, अमिताभ बच्चन, आमिर खान, राणी मुखर्जी, अजय देवगण, अक्षय कुमार, कतरिना कैफ, रणवीर सिंग, आशुतोष राणा, रोहित शेट्टी, जॉन अब्राहम अशा अनेक आघाडीच्या कलाकारांसोबत काम केले आहे. अलीकडेच त्यांनी ‘धर्मवीर’ या मराठी चित्रपटातही काम केले होते. दृश्यम, सूर्यवंशी, सिंबा, मर्दानी, एक व्हिलन रिटर्न यांसारख्या चित्रपटात त्यांनी काम केले होते. त्यांनी काही जाहिराती, तसेच दाक्षिणात्य चित्रपटातही काम केले होते. त्यांच्या पार्थिवावर वागळे इस्टेट येथील भवानीनगर स्मशानभूमीत अंत्यसंस्कार करण्यात आले.