भिवंडी, ता. ७ (वार्ताहर) : मुंबई-आग्रा महामार्ग आणि मुंबई-अहमदाबाद महामार्गाला जोडणाऱ्या अंजूरफाटा खारबाव-चिंचोटी कामण रस्त्याची देखभाल, दुरुस्तीअभावी टोलवसुली करणाऱ्या ठेकेदाराकडून दुर्लक्ष केल्याने दुरवस्था झाली आहे. या रस्त्यावर खड्ड्यांमुळे प्रवाशांचे हाल होते. मात्र, आता हा रस्ता काँक्रीटचा होणार आहे. यासाठी २२९ कोटी ११ लाख रुपयांची निविदा मंजूर झाली आहे. येत्या दोन महिन्यांत काँक्रीटीकरणाच्या कामाला सुरुवात होईल.
स्थानिक ग्रामस्थ आणि वाहनचालकांना रस्त्याच्या चाळणेमुळे दिवसेंदिवस त्रास सहन करावा लागत होता. माजी केंद्रीय राज्यमंत्री कपिल पाटील यांनी या रस्त्याच्या कामासाठी केलेल्या पाठपुराव्याला यश मिळाले असून, काम पूर्ण झाल्यावर दररोज हजारो प्रवाशांना दिलासा मिळणार आहे.
खारबाव-चिंचोटी कामण रस्त्याची मोठ्या प्रमाणावर दुरवस्था झाली होती आणि काही महिन्यांपासून वाहतूककोंडीत प्रवाशांचे हाल होत होते. या समस्येबाबत कपिल पाटील यांनी तत्कालीन उपमुख्यमंत्री देवेंद्र फडणवीस, सार्वजनिक बांधकाममंत्री व भाजप प्रदेशाध्यक्ष रवींद्र चव्हाण यांच्याकडे निवेदन दिले आणि काँक्रीटीकरणाची मागणी केली. या वेळी २२९ कोटी ११ लाख रुपयांच्या कामाला मंजुरी मिळाली; मात्र तांत्रिक अडचणींमुळे काम रखडले होते. मुसळधार पावसामुळे तीन महिन्यांपासून प्रवाशांचे त्रास वाढले होते. कपिल पाटील यांनी मुख्यमंत्री देवेंद्र फडणवीस, सार्वजनिक बांधकाम मंत्री शिवेंद्रराजे भोसले आणि तत्कालीन मंत्री रवींद्र चव्हाण यांच्याकडे सातत्याने पाठपुरावा केला, ज्यामुळे निविदेतील तांत्रिक अडचणी दूर होऊ शकल्या. पावसाळ्यानंतर लगेच रस्त्याच्या कामाला सुरुवात होईल. या कामाला मंजुरी मिळवून देण्यात पाटील यांनी महत्त्वाची भूमिका बजावली. याबद्दल नागरिकांनी त्यांचे आभार मानले आहेत.