कार्यकर्त्यांची हौस, स्वयंसेवक प्रशासनाचे अतोनात हाल
कांदिवली, ता. ७ (बातमीदार) ः कांदिवली विभागात पूर्वेला आठ कृत्रिम, पश्चिमेला नऊ कृत्रिम आणि तीन नैसर्गिक तलाव आहेत. या सर्व तलावांमध्ये एकूण १८ हजारांहून अधिक गणेशमूर्तींचे विसर्जन करण्यात आले.
कांदिवली गावठाण नैसर्गिक तलावात ५५३ व कृत्रिम तलावांमध्ये १३५ गणेशमूर्तींचे सुरक्षितपणे विसर्जन करण्यात आले. यावर्षी काही मंडळांनी उशिरा गणपती बाहेर काढल्याने रविवारी सकाळी ९ वाजता शेवटच्या गणेशमूर्तीचे विसर्जन करण्यात आले. सकाळी १० वाजता स्वयंसेवक, पालिका अधिकारी आणि पोलिस अधिकारी व कर्मचारी थकलेल्या स्थितीत घरी परतले. विसर्जनानंतर १०० पोलिस कर्मचारी, वाहतूक पोलिस आणि पालिका कर्मचाऱ्यांसह यंग स्टार क्रीडा मंडळाच्या कार्यकर्त्यांनी सुटकेचा निःश्वास सोडला. तब्बल १६ तास स्वयंसेवक पाण्यात विसर्जनाचे कार्य अविरत करत होते. काही मंडळांच्या गणेशमूर्तींचे उशिरा आगमन झाल्याने विसर्जनास फार उशीर झाला. त्याचा नाहक त्रास कार्यकर्ते, पोलिस आणि पालिका अधिकाऱ्यांना सहन करावा लागला.