अंबरनाथ, ता. ८ (वार्ताहर) : चंद्रग्रहणाचा प्रभाव कमी करण्यासाठी अंबरनाथ पश्चिमेतील राजस्थानी समाजातर्फे भजन-कीर्तन घेण्यात आले. माँ अंबे व बाबा रामदेव पिरजी मंदिर परिसरात झालेल्या या कार्यक्रमात समाजातील शेकडो नागरिकांनी भक्तिभावाने सहभाग घेतला. देशभरात रविवारी (ता. ७) दिसणाऱ्या चंद्रग्रहणाच्या पार्श्वभूमीवर हा धार्मिक उपक्रम पार पडला. पारंपरिक वाद्यांच्या तालावर गायकांनी भक्तिगीते सादर करत मंदिर परिसराला भक्तिमय रंगत आणली. कार्यक्रमानंतर उपस्थितांना महाप्रसादाचे वाटप केले. या उपक्रमामुळे समाजामध्ये श्रद्धा आणि एकात्मतेची भावना अधिक दृढ झाल्याचे नागरिकांनी सांगितले.