करंजवाडी गावाला रस्‍ता नसल्याने ग्रामस्‍थांचे हाल
राष्ट्रवादी पक्षाच्या माध्यमातून प्रांत अधिकाऱ्यांना निवेदन
रोहा, ता. १० (बातमीदार) ः देशाला स्वातंत्र्य मिळवून कित्येक वर्षे उलटली तरी रोहा तालुक्यातील करंजवाडी गावाला साधा रस्ता नसल्याने स्‍थानिकांकडून नाराजी व्‍यक्‍त केली जात आहे. स्थानिक आमदार, खासदार लक्ष देत नसल्याने ग्रामस्थांना न्याय देण्याकरिता राष्ट्रवादी पक्षाच्या शरद पवार गटाचे नेते आक्रमक झाले असून, त्यांच्या मार्गदर्शनाखाली महिलांनी मोर्चाद्वारे शासनाला निवेदन दिले. या वेळी उपस्थित महिला, ग्रामस्थ, तरुणवर्ग यांनी लोकप्रतिनिधी व शासनाच्या विरोधात संताप व्यक्त केला.
रोहा तालुक्यातील धोंडखार ग्रामपंचायत हद्दीतील करंजवाडी येथे धनगर समाजाची मोठी लोकवस्ती आहे. गेले कित्येक वर्षे या वस्तीला रस्ता नाही. ग्रामस्थांनी अनेक राजकीय नेत्यांचे उंबरठे झिजवले, परंतु कोणीही दखल घेतली नाही. या वस्तीवरील कोणी व्यक्ती आजारी पडला, महिला गरोदर असेल तर डोलीमध्ये न्यावे लागते, अशी भयावह अवस्था ग्रामस्थांची आहे. त्‍यामुळे ग्रामस्थांनी शरद पवार गट पक्षाचे रोहा तालुका अध्यक्ष तुषार खारिवले यांची भेट घेतली व व्यथा मांडली. या वेळी तातडीने या गंभीर प्रश्नाची दाखल घेत तुषार खारिवले यांनी राष्ट्रवादी काँग्रेस पक्ष (शरद पवार) गटाचे जिल्हाध्यक्ष रवींद्र चव्हाण यांच्यासमवेत अन्य कार्यकर्ते मंडळींना रोह्यात बोलावून ग्रामस्थांतर्फे सार्वजनिक बांधकाम विभाग व प्रांत अधिकारी ज्ञानेश्वर खुटवड यांना निवेदन दिले. या वेळी जिल्हाध्यक्ष रवींद्र चव्हाण यांनी रोह्यातील लोकप्रतिनिधींबद्दल तीव्र नाराजी व्यक्त केली. करंजवाडी येथील नागरिकांना आपण पारतंत्र्यात आहोत, असे वाटते. साधा रस्ताही नाही. त्यामुळे यापुढे शासनाने जर रस्ता केला नाही तर आम्ही ५० कुटुंबे आम्‍ही आमचे बरेवाईट करू, असा इशारा ग्रामस्थांना दिला. यामुळे शासनाने रस्त्याचा प्रश्न मार्गी लावावा अन्यथा मोठे आंदोलन उभे करू, असा इशारा जिल्हाध्यक्ष रवींद्र चव्हाण यांनी दिला.