चिरनेर-खारपाडा मार्गावर डेब्रिज
अपघात होण्याची भीती; कारवाईची मागणी
उरण, ता. ९ (वार्ताहर) ः पर्यावरणाला हानिकारक ठरणारे मुंबईतील डेब्रिज चिरनेर-खारपाडा मार्गावरील खिंडीत रस्त्यावर जागोजागी बेकायदा टाकण्यात येत आहे. त्यामुळे या मार्गावर अपघात होण्याची शक्यता नाकारता येत नाही. या अवैधरीत्या डेब्रिज टाकणाऱ्यांवर कारवाई करावी, अशी मागणी जोर धरू लागली आहे.
मुंबईचा डेब्रिज हा विषय जटिल बनत चालला आहे. याआगोदर सिडकोसह वन विभागाच्या उलवे, पनवेल, जासई, गव्हाण-चिर्ले, गव्हाण फाटा मार्गांवर डेब्रिज टाकले जात आहे. त्या परिसरात असे डेब्रिजचे अनेक डोंगर बनले आहेत. दरम्यान, या डेब्रिजमाफियांनी आता जिथे जागा मिळेल तेथे कचरा टाकण्याचा प्रकार सुरू केला आहे. त्‍यामुळे चिरनेर-खारपाडा मार्गावरील खिंडीत रस्त्यावरच अशा प्रकारे अवैधरीत्या डेब्रिज टाकले जात आहे. हे डेब्रिज रस्त्यात टाकल्याने अपघात होण्याची भीती निर्माण झाली आहे. तसेच या डेब्रिजमध्ये जैवविविधतेला घातक ठरणाऱ्या धोकादायक घटकांचाही समावेश असतो. शासकीय अधिकारी, कर्मचाऱ्यांच्या नजरा चुकवून रात्रीच्या वेळेत मोठ्या प्रमाणावर मुंबईतील डेब्रिज आणण्यात येते. यामुळे पर्यावरणासह नागरिकांचे आरोग्य धोक्‍यात आले आहे. त्‍यामुळे डेब्रिज टाकणाऱ्यांवर कारवाई करण्याची मागणी जोर धरू लागली आहे.