काठमांडूत अडकले मुरबाड, कल्याणमधील नागरिक!
आमदार किसन कथोरे यांचा मदतीचा हात
बदलापूर, ता. १० (बातमीदार) : नेपाळमधील वाढत्या राजकीय अस्थिरतेमुळे आणि देशव्यापी संचारबंदीमुळे पर्यटनासाठी गेलेले मुरबाड आणि कल्याण तालुक्यातील काही नागरिक काठमांडूमध्ये अडकून पडले आहेत. त्यांना मदत करण्यासाठी मुरबाड विधानसभा मतदारसंघाचे आमदार किसन कथोरे यांनी तत्काळ पुढाकार घेतला असून, मुख्यमंत्र्यांशी संपर्क साधून या नागरिकांना सुरक्षित परत आणण्याचे आश्वासन दिले आहे.
नेपाळमध्ये बेरोजगारी आणि भ्रष्टाचाराविरोधात युवकांनी तीव्र आंदोलन पुकारले आहे. या आंदोलनाला हिंसक वळण लागल्याने सरकारने देशभरात संचारबंदी लागू केली आहे. यामुळे जनजीवन विस्कळित झाले आहे. रस्त्यावर उतरलेल्या आंदोलकांवर काही ठिकाणी गोळीबार झाल्याचीही माहिती मिळत आहे. अशा परिस्थितीत नेपाळमध्ये पर्यटनासाठी गेलेले ठाणे जिल्ह्यातील अनेक नागरिक, विशेषतः मुरबाड आणि कल्याण तालुक्यातील काही लोक काठमांडूमधील हॉटेल्समध्ये अडकून पडले आहेत.
आमदार किसन कथोरे यांना ही माहिती मिळताच त्यांनी तत्काळ अडकलेल्या नागरिकांशी व्हिडिओ कॉलद्वारे संपर्क साधला. त्यांनी नागरिकांना धीर देत हॉटेल सोडून बाहेर न पडण्याचे आवाहन केले आहे. आमदार कथोरे यांच्या या तत्परतेमुळे आणि संवेदनशील भूमिकेमुळे अडकलेल्या नागरिकांना मोठा दिलासा मिळाला आहे. त्यांनीदेखील आमदारांच्या सूचनांचे पालन करण्याची ग्वाही दिली आहे. आपल्या मतदारसंघातील नागरिकांसाठी आमदारांनी दाखवलेली ही काळजी आणि तत्परता सध्या कौतुकाचा विषय ठरत आहे.

आमदार कथोरे यांनी दिला धीर
‘‘तुम्ही घाबरून जाऊ नका. तुम्हाला सुरक्षित महाराष्ट्रात परत आणण्यासाठी मी सर्वतोपरी प्रयत्न करीत आहे,’’ असे आश्वासन त्यांनी दिले. यासंदर्भात त्यांनी मुख्यमंत्री देवेंद्र फडणवीस यांच्याशी संपर्क साधून परिस्थितीची माहिती दिली. केंद्र आणि राज्य सरकार यांच्या माध्यमातून या नागरिकांना लवकरात लवकर परत आणण्यासाठी प्रयत्न सुरू असल्याचेही त्यांनी सांगितले.