शिवाजी पार्कात ठाकरे गटाचा आवाज
दसरा मेळाव्यासाठी पालिकेकडून मंजुरी
सकाळ वृत्तसेवा
मुंबई, ता. १० : दसऱ्या मेळाव्याच्या परवानगीसाठी शिवसेना ठाकरे गटाकडून आलेला एकमेव अर्ज पालिकेने मंजूर करीत दसरा मेळाव्याला परवानगी दिली आहे. २ ऑक्टोबर रोजी होणाऱ्या या मेळाव्यासाठी शिवसेना ठाकरे गटाने जोरदार तयारी सुरू केल्याचे सांगण्यात आले.

शिवसेनाप्रमुख बाळासाहेब ठाकरे आणि शिवाजी पार्क मैदान हे अतुट नाते असून गेल्या अनेक वर्षांपासून याठिकाणी दसरा मेळाव्याचे आयोजन केले जाते. या मेळाव्यासाठी राज्यातील कानाकोपऱ्यातून हजारो शिवसैनिक शिवतीर्थावर दाखल होत असतात. यावर्षी २ ऑक्टोबर रोजी दसरा मेळावा होत असून शिवसेनेतील गटबाजीनंतर शिंदे गट व ठाकरे गटाकडून दसरा मेळावा आयोजित केला जातो आहे. त्यातच ठाकरे गटाने दसरा मेळाव्यासाठी शिवाजी पार्कसाठी जानेवारीमध्येच पालिकेकडे अर्ज केला होता. पक्षातर्फे आमदार महेश सावंत यांनी हा अर्ज केला. हाच अर्ज पाच वेळा पाठवून शिवसेनेने मेळाव्याच्या परवागीसाठी पालिकेचे लक्ष वेधले. पालिकेने या मेळाव्यासाठी शिवसेना ठाकरे गटाला परवानगी दिली आहे. त्यामुळे यंदा शिवाजी पार्कवर शिवसेना (ठाकरे) गटाचा दसरा मेळावा होणार आहे.
.........