तीन दशके... पाच हजार प्रयोग
ठाणे अधिकारी मनोज सानप रचणार इतिहास
मुंबईच्या सोमय्या महाविद्यालयात शनिवारी प्रयोग
सकाळ वृत्तसेवा
ठाणे, ता. ११ ः तब्बल तीन दशके शहीद कॅप्टन विनायक गोरे या एकपात्री नाटिकेतून देशभक्तीचा संदेश जिवंत ठेवण्याचा प्रयत्न करणारे ठाणे जिल्हा माहिती अधिकारी मनोज सानप आता इतिहास रचणार आहेत. सोमय्या कॉलेजमध्ये १९९५ मध्ये या नाटकाचा पहिला प्रयोग झाला, त्याच ठिकाणी आता शनिवार (ता. १३) पाच हजारावा प्रयोग सादर करणार आहेत.
१९९५ मध्ये जम्मू-काश्मीरच्या रणांगणावर हौतात्म्य पत्करलेल्या कॅप्टन विनायक गोरे यांच्या स्मृतींना वंदन म्हणून मनोज सानप यांनी दुसऱ्याच दिवशी हा प्रयोग प्रथम रंगवला. तेव्हापासून आतापर्यंत लाखो प्रेक्षकांना प्रेरणा देत त्यांनी पाच हजार प्रयोगांचा टप्पा गाठला आहे.

१५ मिनिटांचा नाट्यप्रयोग
फक्त १५ मिनिटांचा हा नाट्यप्रयोग पण प्रत्येक संवाद अंगावर शहारे आणणारा, प्रत्येक शब्द देशभक्तीने ओथंबलेला. या नाटिकेतून कित्येक युवक सैन्यात दाखल झाले, तर काहींनी रक्तदान, अवयवदान आणि सैनिकांच्या कुटुंबांच्या सेवेत स्वतःला वाहून घेतले.

समाज जागृतीचा सोहळा
मनोज सानप यांनी कधीही या प्रवासाला प्रसिद्धी वा लाभाचे साधन बनवले नाही. त्यांचा प्रत्येक प्रयोग हा समाज जागृतीचा सोहळा ठरला. पाच हजार प्रयोग म्हणजे केवळ नाट्याचा टप्पा नाही, तर शहिदांना वाहिलेली कृतज्ञ आदरांजली आहे.