पालिका कर्मचाऱ्यांना दिवाळीपूर्वी २० टक्के बोनस हवा
म्युनिसिपल युनियनची आयुक्तांकडे मागणी
सकाळ वृत्तसेवा
मुंबई, ता. १३ : मुंबई महापालिका कर्मचाऱ्यांना दिवाळीपूर्वी सानुग्रह अनुदान (बोनस) मिळावे, अशी मागणी मुंबई म्युनिसिपल युनियनने केली आहे. याबाबत मुंबई महापालिकेकडे २०२४-२५ या आर्थिक वर्षातील सानुग्रह अनुदान मिळण्यासाठी पालिका आयुक्त भूषण गगराणी यांना पत्र देण्यात आले असल्याची माहिती युनियनचे सरचिटणीस रमाकांत बने यांनी आज दिली.
महापालिकेतील कर्मचाऱ्यांना दरवर्षी दिवाळी बोनस दिला जातो. त्यानुसार यंदा २० टक्के बोनस दिवाळीपूर्वी मिळावा, अशी मागणी युनियनने केली आहे. यात कायम कामगार, अधिकारी, निरीक्षक, सुरक्षा दल कर्मचारी, आरोग्यसेविका, कंत्राटी व बहुउद्देशीय कामगार, आरसीएच-२ व क्षयरोग नियंत्रण संस्थेतील कर्मचारी, एनयूएचएम - डी. एस. एंटरप्रायझेसमार्फत कार्यरत कर्मचारी तसेच बालवाडी शिक्षिका व मदतनीस यांना बोनस देण्यात यावा, असे पत्रात नमूद करण्यात आले आहे.
महापालिकेने यापूर्वीही सातत्याने कर्मचाऱ्यांना दिवाळी बोनस दिला असल्याने यंदाही तोच अनुक्रम सुरू ठेवावा, अशी संघटनेची मागणी असून, या विषयावर लवकरात लवकर बैठक बोलावून निर्णय घ्यावा, अशी विनंती युनियनने केली आहे.