सक्तीच्या सुट्टी भरपाईवरून वाद
शिक्षण विभागाविरोधात पालक संघटनांमध्ये संताप
नवी मुंबई, ता. १४ (वार्ताहर) : नवी मुंबई महापालिका शिक्षण विभागाने अतिवृष्टीमुळे १९, २० ऑगस्ट रोजीच्या दोन दिवसांच्या सुट्ट्या भरून काढण्यासाठी सलग चार शनिवारी शाळा घेण्याचा आदेश काढला आहे. या निर्णयामुळे पालकांमध्ये तीव्र नाराजी आहे. नवी मुंबई पालक संघटनेने आक्षेप घेत महापालिकेच्या शिक्षण विभागाने हा आदेश मागे घ्यावा, अशी मागणी केली आहे.
महाराष्ट्र शासनाच्या आदेशानुसार अतिवृष्टीमुळे १९, २० ऑगस्ट रोजी सर्व शाळांना सुट्टी जाहीर करण्यात आली होती. मात्र सुट्ट्या भरून काढण्यासाठी नवी मुंबई महापालिका शिक्षण विभागाने ४ सप्टेंबर रोजी आदेश जारी केले आहेत. या आदेशानुसार १३, २० आणि २७ सप्टेंबर आणि ४ ऑक्टोबर रोजी पूर्णवेळ शाळा भरवण्याचे निर्देश दिले आहेत. अभ्यासातील तूट भरून काढण्यासाठी हा निर्णय घेण्यात आल्याचे शिक्षण विभागाचे म्हणणे आहे. मात्र या निर्णयावर पालक संघटनेने तीव्र आक्षेप घेतला आहे. तसेच शासन स्तरावर सुट्ट्यांच्या भरपाईबाबत आदेश नसताना स्थानिक स्तरावर शिक्षण विभागाने कोणत्या कायद्याअंतर्गत काढले, असा प्रश्न उपस्थित केला आहे.
----------------------------
मुलांवर अनावश्यक ताण
अनेक शाळांनी दोन दिवस ऑनलाइन वर्ग घेतल्याचे संघटनेने निदर्शनास आणून दिले आहे. विद्यार्थ्यांचे हित, पालकांची अडचण आणि सहा दिवसांच्या सक्तीच्या अभ्यासक्रमामुळे मुलांवर अनावश्यक ताण येऊ शकतो. या बाबींचा शिक्षण विभागाने विचार केला नसल्याचा आरोप पालक संघटनेने केला आहे. तसेच तातडीने आदेश मागे घ्यावा, अशी मागणी पालक संघटनेने केली आहे.
-----------------------------------
शासन स्तरावर भरपाईचे कोणतेही निर्देश नसताना शिक्षण विभागाने अतिवृष्टीमुळे दिलेल्या सुट्ट्या भरून काढण्यासाठी आदेश काढले. हा निर्णय विद्यार्थ्यांवर अनावश्यक ताण आणणारा आहे. त्यामुळे शिक्षण विभागाने तातडीने आदेश मागे घ्यावा.
- सुनील चौधरी, अध्यक्ष, नवी मुंबई पालक संघटना