लवकरच चारपदरी भुयारी मार्गाच्या कामाला सुरुवात
जोगेश्‍वरी, ता. १५ (बातमीदार) ः जोगेश्वरीकरांना वाहतूक कोंडीमधून दिलासा देण्यासाठी पश्चिम द्रुतगती महामार्ग व जोगेश्वरी-विक्रोळी लिंक रोड जंक्शन येथे चारपदरी भुयारी मार्ग उभारण्याच्या कामाला लवकरच सुरुवात होणार आहे. या प्रकल्पाला प्रशासकीय मान्यता मिळाली असून, सल्लागाराची नेमणूकदेखील झाली आहे. १० सप्टेंबर रोजी खासदार रवींद्र वायकर आणि मुंबई महापालिकेचे आयुक्त भूषण गगराणी यांच्या संयुक्त बैठकीत या निर्णयासह अन्य ३० प्रलंबित विषयांवर चर्चा झाली. यात वर्सोवा यारी रोड मार्केटसाठी महिनाभरात निविदा काढणे, दत्ताजी साळवी मंडई व टोपीवाला मार्केट पुनर्विकासाला गती देणे, स्कॉटर कॉलनीचा पुनर्विकास अशा विविध महत्त्वाच्या विषयांचा समावेश होता. हिंदुहृदयसम्राट बाळासाहेब ठाकरे ट्रॉमा रुग्णालय कूपर रुग्णालयाशी संलग्न करण्यात आले असून, येथे १२ अतिदक्षता खाटा कार्यान्वित झाल्‍या आहेत. आणखी २२ खाटांसाठी निविदा काढली जाणार आहे. अंधेरी-सबवे पुलाची पाहणी, वर्सोवा कोळीवाडा घरांच्या दुरुस्तीला परवानगी, गोरेगाव ऑबेरॉय मॉल परिसरातील पाणी निचरा कामांवरही चर्चा झाली. या बैठकीत घेतलेल्या निर्णयांमुळे जोगेश्वरी व परिसरातील नागरिकांना वाहतूक, आरोग्य, पायाभूत सुविधांबाबत मोठा दिलासा मिळणार आहे.