उल्हासनगर, ता. १५ (वार्ताहर) : उल्हासनगरात भाजप युवा मोर्चाचे जिल्हा महासचिव रोशन पुरस्वानी याने साथीदारांसह एका तरुणाला बेदम मारहाण केल्याची धक्कादायक घटना उघडकीस आली आहे. रस्त्यावर सुरू झालेल्या किरकोळ वादाचे रूपांतर हाणामारीत झाल्याने शहरात प्रचंड खळबळ उडाली आहे. या घटनेत जखमी झालेल्या तरुणावर उपचार सुरू असून, नागरिकांनी राजकीय नेत्यांच्या या गुंडगिरीचा निषेध व्यक्त केला आहे.
शहरात पुन्हा एकदा सत्ताधारी पक्षाच्या नेत्यांच्या गुंडगिरीचे दर्शन घडले आहे. भाजप युवा मोर्चाचे जिल्हा महासचिव रोशन पुरस्वानी आणि त्याच्या दोन साथीदारांविरोधात एका तरुणाला बेदम मारहाण केल्याप्रकरणी गुन्हा दाखल करण्यात आला आहे. दोन दिवसांपूर्वी पुरस्वानी मित्रांसोबत कार रस्त्याच्या मधोमध उभी करून गप्पा मारत होता. यावेळी मागून आलेल्या विशाल गुप्ता या तरुणाने कार बाजूला करण्याची विनंती केली. यावरून पुरस्वानी संतापला आणि त्याच्या साथीदारांसह विशालला पकडून बेदम मारहाण केली. अचानक झालेल्या हल्ल्यात विशाल गंभीर जखमी झाला असून, त्याला तत्काळ उल्हासनगर मध्यवर्ती रुग्णालयात दाखल करण्यात आले. या प्रकारानंतर नागरिकांनी तीव्र संताप व्यक्त केला आहे. याप्रकरणी उल्हासनगर पोलिसांनी रोशन पुरस्वानी, विपिन तलरेजा, दिवेश भागवणे आणि इतर साथीदारांविरोधात गुन्हा दाखल केला आहे. सध्या पोलिसांनी तपासाची चक्रे वेगाने फिरवली असून, घटनेमागील पार्श्वभूमी आणि राजकीय दबावाचा शोध घेण्याचे प्रयत्न सुरू आहेत.