पालघर, ता. १६ : बोईसर पोलिस ठाणे हद्दीमध्ये काही जणांचे मोबाईलमध्ये चित्रीकरण करत असल्याचा राग मनात धरून आठ ते नऊ जणांनी दोघांना बेदम मारहाण केल्याचा प्रकार घडला आहे.

चिराग ओझा हे सोमवारी (ता. १५) रात्री ११ वाजण्याच्या सुमारास कृष्णा नगर ते धनानी नगर रस्त्यावरून त्यांच्या दुकानात जात असताना राहुल पाल, राजेश यादव, अमित यादव, अविनाश शर्मा आणि चार ते पाच महिला हे हातात लाकडी दांडके घेऊन उभे होते. चिराग या सर्वांचे व्हिडिओ चित्रीकरण करत असताना जाब विचारून चिरागला सर्वांनी मारहाण करायला सुरुवात केली. चिरागला मारहाणीतून सोडवायला आलेला त्याचा मित्र अनिरुद्ध यादव यालाही त्यांनी मारहाण करून जखमी केले. या घटनेनंतर चिराग याने बोईसर पोलिस ठाण्यात सर्वांविरुद्ध मारहाण केल्याची तक्रार केली. पोलिसांनी नऊ जणांविरोधात मारहाण केल्याप्रकरणी गुन्हा दाखल केला आहे.