पेज नदीपात्रात सापडला मृतदेह
कर्जत (बातमीदार)ः तालुक्यातील टाकवे येथे पेज नदीपात्रात एका व्यक्तीचा मृतदेह आढळून आला आहे. या व्यक्तीचा मृतदेह पाच दिवसांपेक्षा अधिक काळ पाण्यात राहिल्याने चेहरा विद्रूप झाला होता. पोलिसांकडून ओळख पटवण्यासाठीचे प्रयत्न सुरू आहेत.
धारप सोसायटीजवळील झाडाझुडपातून नदीकिनारी मंगळवारी (ता. १६) दुपारनंतर कर्जत पोलिसांना माहिती मिळाली होती. त्यानुसार कर्जत पोलिसांनी रक्षा सामाजिक मंडळ टीमचे सुमीत गुरव, तसेच खोपोली येथील गुरुनाथ साठेलकर यांच्या हेल्प फाउंडेशनसोबत घटनास्थळी शोधमोहीम सुरू केली. सायंकाळी साडेसातच्या सुमारास पथकाला झाडाझुडपात अडकलेला मृतदेह सापडला होता. या घटनेत आकस्मिक मृत्यूची नोंद करण्यात आली असून कर्जत पोलिसांकडून पुढील तपास सुरू आहे.