मुख्य रस्त्यावरच फुटपाथ काबीज
नागरिकांची गैरसोय, वाहतुकीला अडथळा

टिटवाळा ता. १७ (वार्ताहर) : मांडा-टिटवाळा पश्चिम येथील वासुंद्री रोड हा मुख्य रस्ता असून, या रस्त्यावरून दररोज हजारो नागरिकांची वर्दळ असते; मात्र याच रस्त्यावर नवीन उभारल्या जात असलेल्या इमारतीचे बांधकाम साहित्य थेट फुटपाथवर टाकण्यात आले आहे. तसेच रस्ता काबीज करण्यात आला आहे. विटांचे ढीग, वाळूचे आणि सिमेंटच्या गोण्या तसेच बांधकामासाठी लागणारी यंत्रसामग्री थेट पदपथावर ठेवण्यात आली आहे. यामुळे सामान्य नागरिकांना चालण्यास जागा उरलेली नाही, तर वाहनचालकांनाही वाहतुकीच्या वेळी मोठ्या अडचणींना सामोरे जावे लागत आहे.

एमएमआरडीएच्या माध्यमातून या मुख्य रस्त्याचे काम हाती घेतले असून, येथे सिमेंट रस्त्याचे बांधकाम सुरू आहे; मात्र बांधकाम सुरू असलेल्या इमारतीतून पडणारे सिमेंट, राडारोडा व पाणी नाल्यात जाऊन गटारे चोकअप होत आहेत. त्यामुळे सांडपाणी रस्त्यावर साचत आहे, परिणामी दुर्गंधीचा असह्य त्रास नागरिकांना सहन करावा लागत आहे. रस्त्यावर पाणी साचल्याने पावसाळ्यात अपघाताचा धोका अधिक वाढला आहे.
पादचारी मार्गावरून चालण्याऐवजी नागरिकांना थेट रस्त्यावरूनच जाण्याची वेळ येत आहे. त्यामुळे अपघाताचा धोका तर वाढलाच आहे, तसेच या ठिकाणी गर्दी, वाहतूक कोंडी आणि अस्वच्छतादेखील दिवसेंदिवस वाढत चालली आहे.

कारवाईची मागणी
स्थानिक नागरिकांनी अनेकदा या प्रकाराबद्दल नाराजी व्यक्त केली असून, ‘‘बांधकामदारांनी आपल्या सोयीसाठी फुटपाथ काबीज केला आहे. प्रशासन मात्र याकडे डोळेझाक करत आहे. या सगळ्या प्रकारामुळे त्रास फक्त आम्हा नागरिकांना सहन करावा लागतो,’’ असा संताप नागरिकांनी व्यक्त असून, महापालिकेवर रोष व्यक्त केला आहे. महापालिकेने तत्काळ कारवाई करून फुटपाथवरील बांधकाम साहित्य हटवावे, तसेच अशा बेफिकीर बांधकामदारांवर दंडात्मक कारवाई करावी, अशी मागणी स्थानिकांनी केली आहे अन्यथा नागरिकांचा रोष आणखी भडकण्याची शक्यता आहे.