उल्हासनगर, ता. १७ (वार्ताहर) : उल्हासनगर महापालिकेच्या सार्वत्रिक निवडणुकीमधील प्रारूप प्रभागरचनेवर नागरिकांच्या हरकती व सूचनांची सुनावणी होणार आहे. या महत्त्वाच्या प्रक्रियेसाठी संपूर्ण महापालिका प्रशासन सज्ज झाले आहे. शहीद जनरल अरुण कुमार वैद्य सभागृहात शुक्रवारी (ता. १९) होणाऱ्या या सुनावणीदरम्यान पारदर्शकता आणि शिस्तबद्धता कायम राहावी यासाठी आयुक्त मनीषा आव्हाळे यांच्या आदेशानुसार महापालिकेच्या विविध विभागांना स्वतंत्र जबाबदाऱ्या सोपविण्यात आल्या आहेत.
महापालिका सार्वत्रिक निवडणुकीच्या पार्श्वभूमीवर प्रारूप प्रभागरचनेवर नागरिक, संघटना आणि पक्षांनी दाखल केलेल्या हरकती व सूचनांची सुनावणी आता शुक्रवारी होणार आहे. सकाळी १० वाजल्यापासून शहीद जनरल अरुण कुमार वैद्य सभागृह (टाऊन हॉल) येथे सुनावणीला सुरुवात होणार आहे. जिल्हाधिकारी ठाणे यांनी नियुक्त केलेले प्राधिकृत अधिकारी व भिवंडी महापालिकेचे आयुक्तांच्या अध्यक्षतेखाली ही कार्यवाही पार पडणार आहे. सुनावणीदरम्यान कोणताही अडथळा येऊ नये आणि कामकाज सुरळीत व्हावे यासाठी महापालिकेच्या विविध विभागांना स्पष्ट जबाबदाऱ्या सोपविल्या आहेत. पालिका सचिव, उपायुक्त (मुख्यालय), सुरक्षा अधिकारी, कार्यकारी अभियंता, आयटी विभागाचे सिस्टम ॲनलिस्ट, जनसंपर्क अधिकारी, भांडार विभाग, सार्वजनिक बांधकाम विभाग या विभागावर ही जबाबदारी सोपविण्यात आली आहे.

विभागप्रमुखांना आयुक्तांच्या सूचना
सुनावणीसंबंधी तयारीत कुठेही ढिलाई किंवा टाळाटाळ होऊ नये. ही सुनावणी नागरिकांचा विश्वास आणि प्रशासनाची पारदर्शकता टिकवणारी महत्त्वाची प्रक्रिया असल्याने, प्रत्येक विभागाने आपली जबाबदारी प्रथम प्राधान्याने पूर्ण करण्याची दक्षता घ्यावी, अशा स्पष्ट सूचना आयुक्तांनी संबंधित विभागप्रमुखांना दिल्या आहेत.