उल्हासनगर, ता. १७ (वार्ताहर) : उल्हासनगरच्या पवई चौकातील आचल पॅलेस बारवर पोलिसांनी रात्री उशीरा छापा टाकला. यात चालक, व्यवस्थापक, वेटर, १० बारबाला; तसेच आठ ग्राहकांसह तब्बल २३ जणांविरुद्ध गुन्हा दाखल केला.
शहरातील डान्स बारवरील पोलिसांचे कारवाईचे सत्र सुरूच असून, सोमवारी (ता. १५) पोलिस उपायुक्त सचिन गोरे यांच्या मार्गदर्शनाखाली मध्यवर्ती पोलिस ठाण्याचे वरिष्ठ निरीक्षक शंकर अवताडे यांच्या पथकाने पवई चौकातील आचल पॅलेस बारवर कारवाई केली. रात्रीच्या सुमारास पोलिसांनी अचानक टाकलेल्या छाप्यात बारमधील महिला ग्राहकांशी अश्लील हावभाव व कृत्ये करताना आढळून आले. याप्रकरणी पोलिसांनी बारचालक निधी जया शट्टी, व्यवस्थापक रविकांत तिवारी, वेटर रमेश मलिक, पद्मालोचन सुदम माझी आणि शिवमकुमार गुप्ता यांना ताब्यात घेतले. तसेच १० बारबाला व आठ ग्राहकांसह एकूण २३ जणांविरुद्ध गुन्हा दाखल केला आहे. छाप्यावेळी बारमध्ये नियमबाह्य पद्धतीने व्यवसाय सुरू होता. महिलांना पुढे करून ग्राहकांकडून जादा रक्कम वसूल केली जात होती. कायद्याचे उल्लंघन करून अशा स्वरूपाचे बार पुन्हा सुरू झाल्याने शहरातील नागरिकांमध्ये तीव्र नाराजी व्यक्त होत आहे. दरम्यान, दोन दिवसांपूर्वी उल्हासनगरातील हंड्रेड डेज, ॲपल बार आणि इतर डान्स बारवरही अशाच प्रकारे कारवाया केल्या होत्या. कारवाईनंतर मात्र काही दिवसांनी हे बार पुन्हा सुरू होतात. त्यामुळे प्रशासनाकडून कायमस्वरूपी उपाययोजना करण्याची मागणी नागरिकांकडून होत आहे.