नवरात्रोत्सवावर परतीच्या पावसाचे सावट
आगामी काळतील नक्षत्रे पावसाचीच
अलिबाग, ता. १७ (वार्ताहर) ः गणेशोत्सवानंतर सर्वांनाच वेध लागतात ते नवरात्रोत्सवाचे. नवरात्रोत्सवात गरबा, दांडिया खेळण्यासाठी तरुणाई सज्ज झाली आहे. अशात गणेशोत्सवात भक्तांची धांदल उडविणाऱ्या पावसाला आता परतीचे वेध लागलेले आहेत, मात्र आगामी काळात येणारी दोन्ही नक्षत्रे ही पावसाचीच असल्याने ऐन नवरात्रोत्सवावरही पावसाचे सावट असण्याची शक्यता पंचांगातून व्यक्त केली जात आहे.
गणेशोत्सवाप्रमाणे नवारत्रोत्सवदेखील सर्वांच्याच आवडीचा उत्सव आहे. अश्विन महिन्यात साजरी केली जाणाऱ्या नवरात्रीला शारदीय नवरात्र म्हटले जाते. या उत्सवात नऊ दिवस अनेक भक्त उपवास करतात आणि दांडिया, गरबा असे खेळ खेळले जातात. या नऊ दिवसांत देवीच्या विविध नऊ रूपांची पूजा केली जाते. २३ सप्टेंबरपासून सर्वत्र शारदीय नवरात्रोत्सव सुरू होत आहे. पुढील १० दिवस हा उत्सव अतिशय उत्साहात आणि पारंपरिक पद्धतीने साजरा केला जातो, पण गणेशोत्सवाप्रमाणेच नवरात्रातही वरुणराजा जोरकस हजेरी लावेल, असा अंदाज आहे. याचदरम्यान २७ सप्टेंबरला नक्षत्र बदल होत आहे.

हस्त नक्षत्राचा कार्यकाळ
हस्त नक्षत्राचा कार्यकाळ सुरू होणार आहे. या काळात कोकण, पश्चिम महाराष्ट्र, मराठवाडा विभागात चांगला, तर विदर्भात अतिवृष्टी होण्याची शक्यता नाकारता येत नाही. पंचांग शास्त्रानुसार २९ सप्टेंबर ते ३ ऑक्टोबर या काळात पाऊस पडण्याची शक्यता आहे. याचदरम्यान, नवरात्रोत्सवाला बहर आलेला असतो. त्यामुळे नवरात्रोत्सवातही वरुणराजाची हजेरी लागणार आहे. त्यामुळे तरुणाईच्या उत्साहावर पाणी फिरण्याची शक्यता आहे.