बेकायदा बांधकाममाफियांची दादागिरी
वसई-विरारमध्ये पालिकेची कारवाई थांबवली
बोळिंज, ता. १७ (बातमीदार) : वसई-विरार परिसरात बेकायदा बांधकाम करणाऱ्या माफियांची दादागिरी पुन्हा एकदा समोर आली आहे. पेल्हार प्रभागातील चौधरी कम्पाउंडमध्ये एका नव्या इंडस्ट्रियल गाळ्याच्या अनधिकृत बांधकामावर कारवाईसाठी गेलेल्या महापालिकेच्या पथकाला बांधकाममाफियाने अडवून कारवाई रोखली.
माफियाने तोडक पथकातील कर्मचाऱ्यांना धमक्या देत तब्बल तीन तास ताटकळत ठेवले आणि त्यानंतर कारवाई न करताच परत पाठवले. यामुळे विरारमधील इमारत दुर्घटनेनंतर पालकमंत्री गणेश नाईक यांनी अवैध बांधकामांवर कठोर कारवाई करण्याची दिलेली हमी पायदळी तुडवल्याचे स्पष्ट झाले आहे. या घटनेमुळे या बांधकाममाफियांना कोणाचा पाठिंबा आहे आणि कोणाच्या आदेशाने महापालिकेने कारवाई थांबवली, असे प्रश्न निर्माण झाले आहेत. या प्रकरणाची दखल नवनियुक्त आयुक्त मनोज सूर्यवंशी घेणार का, याकडे सर्वांचे लक्ष लागून आहे.

पालिकेच्या भूमिकेवर प्रश्नचिन्ह
या घटनेचे चित्रीकरणही उपलब्ध आहे, ज्यात बांधकाममाफिया साहील महापालिका कर्मचाऱ्यांना शिवीगाळ करताना आणि जेसीबी जाळण्याची धमकी देताना दिसतो. त्याने फोनवर बोलून कारवाई थांबवल्याचेही समोर आले आहे. या प्रकारामुळे पालिका प्रशासनाच्या भूमिकेवर प्रश्नचिन्ह निर्माण झाले असून, आता या प्रकरणावर आयुक्त काय कारवाई करतात, हे पाहणे महत्त्वाचे ठरेल.