नवरात्रीत फुलांचे दर स्थिर
भाविकांना दिलासा
वंशिका चाचे : सकाळ वृत्तसेवा
ठाणे, ता. २२ : सोमवारपासून नवरात्रौत्सवाची धूम सर्वत्र सुरू झाली असून, ‘उदे गं अंबे उदे…’ अशा गजराने ठाणे नगरी भक्तिमय झाली आहे. देवीच्या पूजेसाठी मंदिरांमध्ये भाविकांची मोठी गर्दी पाहायला मिळत आहे, त्याचप्रमाणे फुलांच्या बाजारातही खरेदीसाठी उत्साह दिसून आला; मात्र यंदा फुलांचे भाव स्थिर असल्याने नागरिकांना मोठा आर्थिक दिलासा मिळाला आहे.

गणेशोत्सवात फुलांचे भाव गगनाला भिडले होते. त्यामुळे नवरात्रीतही भाववाढ होईल, अशी शक्यता व्यक्त केली जात होती, पण यंदा पुणे आणि आसपासच्या भागांतून फुलांची मोठ्या प्रमाणावर आवक वाढल्याने बाजारात पुरवठा चांगला आहे. परिणामी, मागणी असूनही भाव वाढलेले नाहीत, अशी माहिती फुलविक्रेते हरिश्चंद्र गवस यांनी दिली. हरिश्चंद्र गवस म्हणाले, “पावसामुळे काही माल भिजला असला तरी आवक चांगली आहे. त्यामुळे ग्राहकांना फुलं सामान्य भावात मिळत आहेत.” विशेषतः गोंडा, शेवंती, गुलाब, ऑर्किड अशा प्रमुख फुलांची चांगली उपलब्धता आहे.

दसऱ्याला भाववाढीची शक्यता
नवरात्रीनंतर येणाऱ्या दसऱ्याला गोंड्याच्या फुलांना विशेष महत्त्व आहे. त्या दिवशी ‘सोनं’ म्हणून गोंड्याची फुले देवाला अर्पण केली जातात व आप्तांना दिली जाते. त्यामुळे दसऱ्याच्या दिवशी गोंड्याच्या फुलांच्या भावात चढ-उतार होऊ शकतो, असा अंदाजही फुलविक्रेत्यांनी वर्तवला आहे.

सध्याचे बाजारभाव
फुलाचे नाव भाव (रुपयांत प्रतिकिलो/प्रमाण)
कलकत्ता गोंडा १०० रु./किलो
पिवळा गोंडा २०० रु./किलो
पांढरी शेवंती २०० रु./किलो
पिवळी शेवंती २५० रु./किलो
ऑर्किड ३०० रु./किलो
जिप्सी २०० रु./बंडल
तिळाची फुले २० रु./जुडी
वेणी २० रु./प्रती नग
गजरा १५ रु./प्रती नग
चाफा ३०० रु./वाटा