राधिकाबाई मेघे विद्यालयात प्रदर्शन
नवी मुंबई, ता. २२ (वार्ताहर) : ऐरोलीतील राधिकाबाई मेघे विद्यालयात शनिवारी (ता. २०) प्रकल्प प्रदर्शन मोठ्या उत्साहात पार पडले. या सोहळ्याला महापालिका घणसोली शाळेचे प्राचार्य अशोक सोनवणे हे प्रमुख पाहुणे म्हणून उपस्थित होते.
या प्रदर्शनात शाळेच्या पूर्व-प्राथमिक, प्राथमिक, माध्यमिक व कनिष्ठ महाविद्यालयाच्या विद्यार्थ्यांनी विज्ञान, इतिहास, भूगोल, गणित, हिंदी आदी विषयांवर नावीन्यपूर्ण व वैविध्यपूर्ण प्रकल्प सादर केले. पूर्व-प्राथमिक विभागाच्या शिक्षक व पालकांनी एकत्र येऊन साकारलेला जलचक्र हा प्रकल्प विशेष उल्लेखनीय ठरला, तर पालकांसाठी मेहंदी, रांगोळी, ग्लास पेंटिंग, सलाड मेकिंग अशा स्पर्धांचे आयोजन केले होते. त्याचबरोबर विद्यार्थ्यांनी राजस्थानी, कोळी नृत्य, राधा-कृष्ण लीला यांसारखे सांस्कृतिक कार्यक्रम सादर करून उपस्थितांना मंत्रमुग्ध केले. कनिष्ठ महाविद्यालयाच्या विद्यार्थ्यांनी सादर केलेले सोशल मीडियाचे फायदे तोटे या विषयावरील पथनाट्य विशेष आकर्षण ठरले. या कार्यक्रमाच्या यशस्वीतेसाठी विद्यालयाच्या मुख्याध्यापिका अलका जाधव यांचे मार्गदर्शन लाभले. संस्थेच्या विश्वस्त पुष्पा मेघे, रीमा बसीन, अर्जुन मेघे, शमा मेघे आदींनी प्रोत्साहन दिले.