महिला सक्षमीकरणासाठी ५० महिलांना पाणीपुरीच्या गाड्या
कल्याण (वार्ताहर) : कल्याण पश्चिम येथील बेतूरकरपाडा प्रभागात माजी नगरसेवक अरविंद पोटे यांच्या वाढदिवसानिमित्त महिला सक्षमीकरणासाठी ५० महिलांना पाणीपुरी गाड्यांचे वाटप करण्यात आले. महाराष्ट्र उद्योजकता केंद्र व जिजामाता बचत गट यांच्या सहकार्याने हा उपक्रम राबविण्यात आला. या वेळी महिलांना स्वतःचा व्यवसाय सुरू करण्यासाठी प्रोत्साहन देण्यात आले. या कार्यक्रमात आरोग्य व नेत्रतपासणी शिबिर, मोफत चष्मे व औषध वाटप, विद्यार्थ्यांना वह्या व ज्येष्ठ नागरिकांना छत्र्यांचे वाटप करण्यात आले. शिवसेना उपनेत्या विजया पोटे यांनी मराठी महिलांना आर्थिकदृष्ट्या सक्षम बनवण्याचा उद्देश यामागे असल्याचे सांगितले. कार्यक्रमाला जिल्हाप्रमुख गोपाळ लांडगे, अरविंद मोरे, रवी पाटील, उमेश बोरगांवकर, हर्षवर्धन पालांडे, गणेश कारके आदी मान्यवरांसह अनेक नागरिक उपस्थित होते. समाजोपयोगी कार्यासाठी पोटे कुटुंबाचा नेहमीच पुढाकार राहिला आहे, असे या वेळी वक्त्यांनी सांगितले.