मद्यपी तरुणांमुळे रात्रीच्या वेळी पेट्रोल पंप बंद
सकाळ वृत्तसेवा
डोंबिवली, ता. २९ ः शहरातील पेट्रोलपंप चालकावर रात्रीच्या वेळी आपला पेट्रोल पंप बंद ठेवण्याची वेळ आली आहे. रात्रीच्या वेळी पेट्रोल पंपावर येणारे काही ग्राहक हे कर्मचाऱ्यांशी विनाकारण हुज्जत घालून त्रास देतात. दारू पिऊन काही तरुण कर्मचाऱ्यांना त्रास देत असल्याने हा निर्णय घेतल्याचा बॅनरच या पेट्रोल पंपावर लावण्यात आला आहे. यामुळे सुसंस्कृत डोंबिवलीत वाढती गुन्हेगारी चर्चेचा विषय ठरली आहे. डोंबिवली शहराची ओळख सुसंस्कृत सुशिक्षित डोंबिवली अशी असली तरी सध्याच्या घडीला वाढत्या गुन्हेगारीमुळे शहराची ओळख पुसट होऊ लागली आहे. दिवसाढवळ्या होणाऱ्या लुटमारीच्या घटना तसेच रात्रीच्या वेळी मद्यधुंद तरुणांचा गोंधळ यामुळे शहरात भीतीचे वातावरण निर्माण होऊ लागले आहे. याचेच उदाहरण म्हणजे हा पेट्रोल पंपावर लागलेला फलक आहे.

डोंबिवली पश्चिमेतील राजूनगर, गणेशनगर परिसरात सुरेश मोरे यांचा हा पेट्रोल पंप आहे. सुरेश मोरे हे कल्याण ग्रामीणचे आमदार राजेश मोरे यांचे चुलत भाऊ आहेत. सुरुवातीपासून २४ तास या पेट्रोल पंपावर सुविधा सुरू होती; मात्र आता रात्री ११ ते सकाळी सहा वाजेपर्यंत पेट्रोल पंप बंद ठेवण्याचा निर्णय घेण्यात आला आहे. पंपावर लावलेल्या बॅनरमुळे ही संपूर्ण घटना उघडकीस आली आहे. या बॅनरवर पंप बंद ठेवण्याचे कारण स्पष्ट करण्यात आले आहे. रात्रीच्या वेळी येणारे मद्यधुंद तरुण पेट्रोल पंपावरील कर्मचाऱ्यांना विनाकारण त्रास देतात. कर्मचाऱ्यांना शिवगीाळ करणे, त्यांना मारहाण करणे असे प्रकार वारंवार घडत आहेत. वाढत्या त्रासाला आणि सुरक्षेच्या समस्येला कंटाळून हा निर्णय घेतल्याचे त्यावर लिहिण्यात आले आहे. पेट्रोल पंपावर लावल्याने हा बॅनर सध्या डोंबिवलीत चर्चेचा विषय बनला आहे.