कल्याण पूर्वेत महिलांचे स्वच्छता अभियान
कल्याण, ता. २९ (बातमीदार) : नवरात्रोत्सवानिमित्त पूर्व परिसरात स्वच्छतेचा जागर सुरू असून, रामानंदाचार्य नरेंद्राचार्य महाराज यांच्या महिला टीमतर्फे दररोज सकाळी व संध्याकाळी स्वच्छता उपक्रम राबविले जात आहेत. या अभियानात स्वच्छ भारत अभियान कल्याण शहर टीम तसेच वारकरी समाजाचा सक्रिय सहभाग घेत आहेत. या पार्श्वभूमीवर आमदार सुलभा गायकवाड यांनी तिसगाव येथील श्री जरी मरी आई देवस्थान परिसरास भेट दिली. त्यांनी महिला व वारकरी समाज कार्यकर्त्यांचे कौतुक करत उपक्रमांना शुभेच्छा दिल्या.
स्वच्छता मोहिमे सोबतच जनसामान्यांमध्ये सामाजिक जाणीव जागविण्यासाठी विविध उपक्रम राबविण्यात आले. ‘एक झाड आईच्या नावाने’ या मोहिमेतून पर्यावरण संवर्धनाचा संदेश देण्यात आला. ‘नशामुक्त भारत’ या अभियानाचा प्रचार केला. तसेच देशी वस्तूंच्या वापराबाबत जनजागृती करून स्वदेशी चळवळीला बळ देण्यात आले. नवरात्राच्या पावन पर्वावर स्थानिकांनी मोठ्या उत्साहाने या उपक्रमात सहभाग नोंदवला असून, परिसरात स्वच्छता आणि सामाजिक जाणिवेचे वातावरण निर्माण झाले आहे.