२०१५ पासूनचा मोबदला मिळण्यासाठी पाठपुरावा करणार : मोरेश्वर भोईर
कल्याण, ता. १ (वार्ताहर) : कल्याण डोंबिवली महापालिकेतील २७ गावांतील ४९९ कामगारांना कायमस्वरूपी कामगार म्हणून समाविष्ट केल्याने आनंदाचा दिवस आहे; मात्र शासनाकडून मिळालेली ही मान्यता फक्त २०२५ पासून लागू आहे. कामगारांना २०१५ पासून नियमित केले जाणे आवश्यक होते. त्यामुळे २०१५ ते २०२५ या काळाचा मोबदला सर्व कामगारांना मिळावा, यासाठी पाठपुरावा केला जाईल, असे माजी उपमहापौर मोरेश्वर भोईर यांनी सांगितले.

महाराष्ट्राचे मुख्यमंत्री देवेंद्र फडणवीस, उपमुख्यमंत्री व पालकमंत्री एकनाथ शिंदे, भाजप प्रदेशाध्यक्ष रवींद्र चव्हाण, खासदार डॉ. श्रीकांत शिंदे आणि कल्याण ग्रामीणचे आमदार राजेश मोरे यांच्या संयुक्त प्रयत्नांमुळे हा निर्णय शक्य झाला आहे. मोरेश्वर भोईर यांनी सांगितले की, उपमहापौर असताना २७ गावांतील कामगारांच्या मुदतवाढीसाठी ते नेहमी सभागृहात आवाज उठवत होते. तसेच या कामगारांचे नियमितीकरण होण्यासाठी सातत्याने प्रयत्न करत होते. मागील पाच वर्षांत कामगारांना किमान वेतनानुसार पगारवाढही केली होती. आज महापालिका प्रशासन आणि आयुक्त अभिनव गोयल यांच्या सहकार्याने २७ गावांतील सर्व कामगार कायमस्वरूपी झाले आहेत. तरी सध्याचा दिलासा तात्पुरता आहे. लवकरच २०१५ पासूनचा मोबदला सर्व कामगारांना मिळावा यासाठी देखील आम्ही पाठपुरावा करणार आहोत,” असे मोरेश्वर भोईर यांनी स्पष्ट केले.