डहाणू, ता. १ (बातमीदार) : पालघर जिल्ह्यातील सागरी महामार्गअंतर्गत झाई, बोर्डी, तारापूर, राज्यमार्गावरील डहाणू पारनाका ते बोईसर पास्थळनाक्यापर्यंत २३ किमी आणि पालघर जिल्हाधिकारी कार्यालय ते पारगाव पोलिस चौकीपर्यंतच्या ३३ किमी रस्त्याची सुधारणा करण्यासाठी २५२ कोटी ७७ लाखांची प्रशासकीय मान्यता मिळाली आहे. तिला कोकण सार्वजनिक बांधकाम प्रादेशिक विभागाने २६ जुलै २०२२ रोजी १९६ कोटी ३६ लाखांची स्थापत्य कामे करण्यासाठी तांत्रिक मान्यता दिली होती.

सागरी महामार्ग अंतर्गत येणाऱ्या कामात २७ किमी नवीन रस्त्याचे बांधकाम केले जाणार आहे. यातील २३ किमी रस्त्याचे नूतनीकरण, तर पाच किमी रस्त्याचे काँक्रीटीकरण केले जाणार आहे. या रस्त्याची रुंदी सात ते १२ मीटरच्या दरम्यान असणार आहे. या रस्त्यावर ६८ मोऱ्या, चार स्लॅबकन्वर्ट, पाच लहान पूलांचे बांधकाम, दोन मोठ्या पुलांची दुरुस्ती, ६१ चौकांची सुधारणा, तसेच १५ बस स्थानकांचा समावेश आहे. या सागरी महामार्गाचे काम धुळे जिल्ह्यातील एस. बी. देशमुख कंपनीला देऊन १८४ कोटींची निविदा मंजूर करण्यात आली आहे. तसेच या रस्त्याचे काम सुरू करण्याचा कार्यारंभ आदेश सार्वजनिक बांधकाम विभागाने दिला आहे. त्यामुळे या सागरी महामार्गाचे काम लवकरच सुरू करण्यात येणार असल्याची माहिती सार्वजनिक बांधकाम विभागाचे शाखा अभियंता पोपटराव चव्हाण यांनी दिली.