कैलास नगरातील नागरिकांचा संताप उफाळला
अंगावर चाबकाचे फटके मारत अनोखे आंदोलन
उल्हासनगर, ता. १ (वार्ताहर) : उल्हासनगरच्या कॅम्प क्रमांक ५ मधील कैलास नगरात मूलभूत सुविधांच्या अभावामुळे संतापलेल्या राधाकृष्ण साठ्ये यांनी अनोखे आंदोलन केले. त्यांनी पोतराजाच्या भूमिकेत स्वतःच्या अंगावर चाबकाचे फटके मारत महापालिकेचे लक्ष वेधले. प्रशासनाच्या निष्क्रियतेविरोधात केलेल्या या आंदोलनाने परिसरातील नागरिकांमध्ये तीव्र संताप आणि असंतोष वाढल्याचे दिसून आले.

कैलास नगर हा उल्हासनगर कॅम्प क्र. ५ मधील एक मागासवर्गीय परिसर असून येथे नागरिकांना पिण्याचे स्वच्छ पाणी, स्वच्छतागृहे, सुरक्षित पायवाटा आणि दळणवळणाच्या मूलभूत सुविधांसाठी अनेक अडचणींना सामोरे जावे लागते. खास करून सार्वजनिक शौचालयांची अवस्था इतकी बिकट आहे की, महिलांना नाकावर रुमाल बांधून आत जावे लागत आहे. काही महिन्यांपूर्वी परिसरातील छोटा पूल कोसळला होता, तरीही तो अद्याप दुरुस्त झालेला नाही.

अनेकदा समस्या मांडूनही महापालिकेच्या अधिकाऱ्यांकडून कानाडोळा झाल्याने राधाकृष्ण साठ्ये यांनी या आंदोलनाचा मार्ग निवडला. आजच्या आंदोलनात त्यांनी स्वतःच्या अंगावर चाबकाचे फटके मारत प्रशासनाला सतर्क केले. परिसरातील नागरिकांनी या आंदोलनाला मोठा पाठिंबा दिला आणि म्हणाले, “आमच्या समस्या अनेक वर्षे प्रलंबित आहेत. महापालिकेने तातडीने उपाययोजना केली नाही तर आम्ही आणखी तीव्र आंदोलन करू.”अनोख्या आंदोलनामुळे कैलास नगरातील नागरिकांचा संताप उफाळून बाहेर आला असून, महापालिकेवर मूलभूत सुविधा पुरवण्यात अपयशाचे आरोप करण्यात आले आहेत. जर प्रशासनाने या समस्यांकडे गांभीर्याने न पाहिले, तर परिस्थिती आणखी चिघळू शकते, अशी भीती व्यक्त केली जात आहे.