वीज रोहित्र चोरीचा पर्दाफाश
चौघांना अटक, लाखोंचा मुद्देमाल हस्तगत
कर्जत, ता.१०(बातमीदार)ः धामोते गावातून वीज रोहित्रातील तांब्याच्या कॉईलची चोरी करणाऱ्या टोळीचा नेरळ पोलिसांनी पर्दाफाश करून चार चोरट्यांना अटक केली. या कारवाईत पोलिसांनी १ लाख किंमतीचे ३१० किलो वजनाचे तांब्याचे कॉईल जप्त केले आहेत.
धामोते येथील डिस्कव्हर रिसॉर्टजवळील वीज रोहित्र फोडून २० हजारांची तांब्याची कॉईल चोरीला गेली होती. याबाबत विकास पेरणे यांनी नेरळ पोलिस ठाण्यात तक्रार दाखल केली होती. पोलिसांच्या पथकाने तांत्रिक तपास आणि गुप्त माहितीदारांच्या मदतीने चंदर ठोंबरे (रा. फोंड्याचीवाडी, कर्जत), सुनील हिंदोळा (रा. फोंड्याचीवाडी, कर्जत), नितीन हिंदोळा (रा. फोंड्याचीवाडी, कर्जत), विष्णू कडाळी (रा. शाळंदवाडी, मुरबाड, जि. ठाणे) यांना अटक केली आहे. आरोपींनी धामोते येथील गुन्ह्याबरोबरच माथेरान, कर्जत पोलिस ठाण्याच्या हद्दीत रोहित्र चोरीची कबुली दिली आहे.