घणसोलीत अनधिकृत बांधकामाविरोधात मोठी कारवाई
वाशी, ता. १ (बातमीदार) ः नवी मुंबई महापालिका क्षेत्रातील घणसोली विभाग सेक्टर २१ येथील अनधिकृत बांधकामावर नवी मुंबई महापालिकेने धडक कारवाई केली. जयवंत गायकर या घरमालक व विकसकांनी महापालिकेची कोणतीही पूर्वपरवानगी न घेता आरसीसी तळमजल्याचा कॉलम व पहिल्या मजल्याच्या स्लॅबचे काम सुरू केले होते.
या अनधिकृत बांधकामासंदर्भात नवी मुंबई महापालिकेच्या अतिक्रमण विभागाने नोटीस बजावली होती; मात्र नोटिसीला उत्तर न देता बांधकाम सुरू ठेवल्यामुळे प्रशासनाने कठोर पावले उचलली.
त्‍यानुसार महापालिका आयुक्त डॉ. कैलास शिंदे, अतिरिक्त आयुक्त डॉ. राहुल गेठे आणि उपआयुक्त अतिक्रमण डॉ. कैलास गायकवाड यांच्या निर्देशानुसार घणसोली विभागात निष्कासन मोहिमेचे आयोजन करण्यात आले. सहाय्यक आयुक्त उत्तम खरात, कनिष्ठ अभियंता रितेश पुरव व अतिक्रमण विभागाचे अधिकारी व कर्मचारी उपस्थित होते. या वेळी आठ मजूर, तीन ब्रेकर व एक गॅस कटर यांच्या सहाय्याने अनधिकृत बांधकाम हटविण्यात आले. कारवाईदरम्यान पोलिस पथकदेखील तैनात होते.