सहकार भारती राष्ट्रीय मंत्र्यांचा नवी मुंबई दौरा
जुईनगर, ता. १ (बातमीदार) : भाजप सरकारच्या कार्यकाळात पहिल्यांदाच केंद्रात सहकार मंत्रालय स्थापन करण्यात आले आहे. त्याचाच एक भाग म्हणून विविध राज्यात सहकार खात्याच्या कार्याबाबत माहिती देऊन कार्यकर्त्यांना प्रेरित करण्यात येत आहे. शिवाय ठिकठिकाणी सहकार भारतीची स्थापना करून सहकार खाते मजबूत करण्याचा प्रयत्न केंद्रीय मंत्री अमित शहा करत आहेत. याच सहकार खात्याचे कार्य समजून घेण्यासाठी नवी मुंबई सहकार भारतीच्या वतीने राष्ट्रीय संघटन मंत्री संजय पाचपोर यांचा नवी मुंबई दौरा आयोजित करण्यात आला होता.
या वेळी नवी मुंबईतील ऐरोली येथे कार्यकर्त्यांची बैठक घेण्यात आली. या बैठकीमध्ये सहकार भारतीबद्दल त्याचप्रमाणे सहकार भारतीच्या कार्याबद्दल सविस्तर माहिती पाचपोर यांनी उपस्थितांना दिली. घणसोली येथे विशाल पाटील तसेच केतन पाटील यांना सहकार भारतीच्या देशपातळीवर चालणाऱ्या कार्याची माहिती देऊन सहभागी होण्यासाठी प्रेरित करण्यात आले. कोपरखैरणे या ठिकाणी महिला बचत गट प्रकोष्ठ प्रमुख मंजू गुप्ता यांच्या कार्यालयामध्ये कार्यकर्त्यांचे छोटेखानी बैठकपार पडली. बेलापूर येथे सहकार भारती व हाउसिंग फेडरेशन यांच्या कार्यकर्त्यांना पाचपोर यांनी मार्गदर्शन करत दौऱ्याची सांगता झाली. पाचपोर यांचा नवी मुंबई दौरा कार्यकर्त्यांना नव संजीवनी देणारा त्याचप्रमाणे सहकार भारतीच्या कार्याला वृद्धी देण्यासाठी ऊर्जादायक ठरणार असल्याचे मत नवी मुंबई सहकार भारती कार्यकर्त्यांनी व्यक्त केले. दरम्यान, नवी मुंबई हाउसिंग फेडरेशनवर नियुक्त झालेल्या सहकार भारतीच्या कार्यकर्त्यांचा सत्कार करण्यात आला. सहकार भारती नवी मुंबई अध्यक्ष प्रमोद जोशी, संघटन प्रमुख रश्मी सकपाळ, महामंत्री संतोष मिसाळ, पतपेढी प्रकोष्ठ प्रमुख सुनील सावंत, दुग्ध प्रकोष्ठ प्रमुख सुखदेव डावरे, विभागप्रमुख राजू ठाणगे, महाराष्ट्र प्रांत सह संघटन प्रमुख प्रवीण बुलाख, खारघर प्रमुख प्रदीप डोंगरे आदी मान्यवर या वेळी उपस्थित होते.