डोंबिवलीत गरबा उत्सवात
तरुणावर चॉपरने वार
सकाळ वृत्तसेवा
डोंबिवली, ता. १ ः डोंबिवली पश्चिमेला ठाकूरवाडी भागातील बेडेकर गल्लीमध्ये दांडिया खेळत असलेल्या एका तरुणावर चार जणांनी अचानक चॉपर, लोखंडी सळईने हल्ला करून गंभीर जखमी केल्याची घटना घडली आहे. रविवारी रात्री साडेदहा वाजण्याच्या दरम्यान ही घटना घडली असून, यात कुणाल विजय कुशाळकर (वय १९) हा तरुण जखमी झाला आहे. याप्रकरणी विष्णूनगर पोलिस ठाण्यात चार जणांच्या विरोधात गुन्हा दाखल करण्यात आला आहे.
कुणालच्या तक्रारीवरून पोलिसांनी दिपेश टेकाळे, भैय्या काऊतर, अभय खाडे आणि अन्य एक अशा चार जणांविरोधात भारतीय न्याय संहितेच्या कलमाने गुन्हा दाखल केला आहे. कुणाल हा घरपोच वस्तू विक्री व्यवसायात एका खासगी कंपनीत वितरण कर्मचारी म्हणून कार्यरत आहे. जखमी तरुणांवर पालिकेच्या शास्त्रीनगर रुग्णालयात उपचार करण्यात आले. याप्रकरणी गुन्हा दाखल करण्यात आलेले दोघे अल्पवयीन असल्याची माहिती वरिष्ठ पोलिस निरीक्षक राम चोपडे यांनी दिली.