आरोपीची जन्मठेप न्यायालयाकडून कायम

सकाळ वृत्तसेवा
मुंबई, ता. १ : पुण्यात पूर्वाश्रमीच्या प्रेयसीचा निर्घृण खून केल्याच्या आरोपप्रकरणी सॉफ्टवेअर अभियंत्याला कनिष्ठ न्यायालयाने सुनावलेली जन्मठेपेची शिक्षा उच्च न्यायालयाने नुकतीच कायम ठेवली.

पुण्यात २००८ मध्ये घडलेली ही घटना अत्यंत द्वेष, मत्सर आणि सूडबुद्धीने प्रेरित असल्याचे निरीक्षण न्या. गिरीश कुलकर्णी आणि न्या. अद्वैत सेठना यांच्या खंडपीठाने आरोपीची जन्मठेप कायम ठेवताना नमूद केले. आरोपीने त्याच्या पूर्वाश्रमीच्या प्रेयसीची क्रूरतेने हत्या केली होती. मूळचा मध्य प्रदेशातील रहिवासी असलेल्या दोषसिद्ध आरोपी मोहिंदर मधुरेशला पुणे येथील सत्र न्यायालयाने डिसेंबर २०१६ मध्ये दोषी ठरवून जन्मठेपेची शिक्षा सुनावली होती. या निर्णयाला मोहिंदरने उच्च न्यायालयात आव्हान दिले होते, हे अपील न्यायालयाने फेटाळून लावले.  आरोपीने २० ऑक्टोबर २००८ रोजी पूर्वाश्रमीच्या प्रेयसीची पुण्यातील सदनिकेमध्ये निर्घृण हत्या केली होती. त्या वेळी दोघेही २२ वर्षांचे आणि पुण्यात नोकरी करून राहात होते.