...मग सावरकर सदनाला राष्ट्रीय स्मारकाचा दर्जा का नाही? 

सकाळ वृत्तसेवा
मुंबई, ता. १ : राष्ट्रीय स्मारकाचा दर्जा देण्याच्या निकषांत नसतानाही जिना हाउसला दर्जा मिळू शकतो, तर हाच समान न्याय स्वातंत्र्यवीर विनायक दामोदर सावरकरांच्या दादरस्थित सावरकर सदनाला का मिळू शकत नाही, अशी विचारणा याचिकाकर्त्यांनी बुधवारी (ता. १) उच्च न्यायालयात केली. त्याची दखल घेऊन न्यायालयाने केंद्र सरकारला भूमिका स्पष्ट करण्याचे आदेश दिले. 
सावरकर सदनला वारसा वास्तूचा दर्जा देण्याची मागणी अभिनव भारत काँग्रेस या संस्थेचे अध्यक्ष पंकज फडणीस यांनी जनहित याचिकेतून केली आहे. त्यावर मुख्य न्या. श्री चंद्रशेखर आणि न्या. गौतम अखंड यांच्या खंडपीठापुढे सुनावणी झाली. त्यावेळी, सध्याच्या राष्ट्रीय स्मारकाबाबतच्या नियमांनुसार, शंभर वर्षांच्या वारशाची अट ही वास्तू पूर्ण करत नसली. तरी तिचे महत्त्व लक्षात घेऊन सावरकर सदनला राष्ट्रीय स्मारकाचा दर्जा देण्यात यावा, अशी मागणी याचिकाकर्त्यांनी केली. जिना हाउसला राष्ट्रीय स्मारकाचा दर्जा दिला गेलेला असताना सावरकरांच्या निवासस्थानाला तोच नियम का लागू होत नाही, असा प्रश्नही फडणीस यांनी प्रश्न उपस्थित केला.