अंबरनाथ, ता. ४ (वार्ताहर) : अंबरनाथमध्ये पुन्हा एकदा अमली पदार्थांच्या विक्रीवर पोलिसांनी छापा टाकत कारवाई केली आहे. सुमारे दहा हजार रुपयांचा अर्धा किलो गांजा जप्त करून आरोपीला अटक केली आहे. याप्रकरणी एनडीपीएस कायद्यान्वये गुन्हा दाखल केला आहे.
शंकर राजू इंगळे (वय ४७) असे अटक केलेल्या आरोपीचे नाव आहे. गुप्त माहितीच्या आधारे पोलिस शिपाई मुरलीधर गवळी यांनी ही कारवाई उघडकीस आणली. वरिष्ठ पोलिस निरीक्षक शब्बीर सय्यद यांच्या मार्गदर्शनाखाली बुधवारी (ता. १) रात्री उशिरा पोलिस पथकाने इंगळेच्या घरावर छापा टाकला होता. त्या वेळी अर्धा किलो गांजा आढळला. त्याची बाजारमूल्य सुमारे १० हजार रुपये असल्याचे पोलिसांनी सांगितले. आरोपीवर अमली पदार्थ विरोधी कायद्यानुसार गुन्हा दाखल करून पुढील तपास सुरू आहे. या कारवाईत पोलिस निरीक्षक (गुन्हे) उमेश सावंत, सहाय्यक निरीक्षक सुभाष पानसरे आणि अविनाश गायकवाड यांच्या पथकाने सहभाग घेतला. काही दिवसांपूर्वीच पोलिसांनी एका दाम्पत्याला मोठ्या प्रमाणात अमली पदार्थांसह रंगेहाथ पकडले होते. त्या वेळी शरीफ सलीम शेख आणि त्याची पत्नी यांच्या ताब्यातून तब्बल दोन लाख ५८ हजार रुपयांचा मेफोड्रॉन, हेरॉईन आणि थिनर यांचा साठा जप्त केला होता.