चौदा गावांचे विकासासाठी साकडे
सर्वपक्षीय विकास समितीकडून मंदा म्हात्रे यांची भेट
तुर्भे, ता.६(बातमीदार): राज्य शासनाने चौदा गावांचा नवी मुंबई महापालिकेच्या कार्यक्षेत्रात समावेश करण्याचा महत्त्वपूर्ण निर्णय घेतला आहे. या निर्णयाबद्दल समाधान व्यक्त करत चौदागाव सर्वपक्षीय विकास समितीच्या शिष्टमंडळाने आमदार मंदा म्हात्रे यांची भेट घेतली.
नव्याने महानगरपालिकेत सामाविष्ट झालेल्या गावांच्या विविध प्रश्नांबाबत आमदार मंदा म्हात्रे यांना निवेदन सादर केले. या निवेदनात पायाभूत सुविधा विकास, रस्ते व पाणीपुरवठा व्यवस्था, आरोग्य व शिक्षण क्षेत्रातील सुधारणांची गरज तसेच कर व प्रशासकीय सुविधांशी संबंधित विषयांचा समावेश होता. यावेळी राज्य शासनाचा हा निर्णय दीर्घकालीन मागणीचा सकारात्मक निकाल आहे. चौदा गावांचा सर्वांगीण विकास आणि नागरिकांच्या सोयी-सुविधांच्या वृद्धीसाठी मी सातत्याने प्रयत्नशील राहण्याचे आश्वासन आमदार मंदा म्हात्रे यांनी दिले. यावेळी चौदागाव सर्वपक्षीय विकास समिती अध्यक्ष लक्ष्मण पाटील, उपाध्यक्ष सुखदेव पाटील, सचिव गुरुनाथ पाटील, खजिनदार चेतन पाटील, ज्ञानेश्वर म्हात्रे, भरत भोईर, गणेश जेपाल उपस्थित होते.