दुप्पट दराने नारळाची विक्री
दिवाळीच्या तोंडावर महागाईचा फटका
पनवेल, ता.६ (बातमीदार) :नारळाचे उत्पादन २५ ते ३० टक्क्यांनी घटल्यामुळे किरकोळ बाजारात एका नारळाची किंमत ४० ते ५० रुपयांवर पोहोचली आहे. त्यामुळे दिवाळीपूर्वीच ग्राहकांच्या खिशावर भार पडला आहे.
पनवेल परिसरात तामिळनाडू, केरळ आणि कर्नाटक राज्यातून नारळाची आवक होते. मात्र, या राज्यांतील उत्पादन घटल्याने पुरवठा कमी झाला आहे. त्यातच सणासुदीच्या दिवसांत मागणी वाढल्याने दर आणखी चढले आहेत. सध्या पनवेल तालुक्यात उत्सव काळात दररोज सुमारे एक ते दीड लाख नारळांची विक्री होत असल्याचे विक्रेत्यांचे म्हणणे आहे. किरकोळ विक्रेत्यांकडून मागणी २५ ते ३० टक्क्यांनी वाढली असून दिवाळीपर्यंत हीच परिस्थिती कायम राहण्याची शक्यता आहे. सण-उत्सवाच्या काळात नारळाला चांगली मागणी असते. अनियमित हवामान आणि कीटकांच्या प्रादुर्भावामुळे उत्पादन घटले आहे. आता दिवाळी जवळ आल्याने नारळाच्या दरात आणखी वाढ होऊ शकते, असे व्यापारी दीपक बोरा यांनी सांगितले.