कल्याण पूर्वेतील रस्त्यांची दुरुस्ती सुरू
नागरिकांना दिलासा
कल्याण, ता. ८ (बातमीदार): गेल्या अनेक महिन्यांपासून कल्याण पूर्वेतील रस्त्यांची झालेली दयनीय अवस्था लक्षात घेऊन नागरिक आणि स्थानिक लोकप्रतिनिधींनी केलेल्या सातत्यपूर्ण पाठपुराव्याला अखेर यश मिळाले आहे. कल्याण-डोंबिवली महापालिका (केडीएमसी) प्रशासनाने श्री मलंग रोड परिसरात रस्ते दुरुस्तीच्या कामांना सुरुवात केली आहे. रस्त्यांवर खड्ड्यांचे साम्राज्य निर्माण झाल्यामुळे वाहनचालक आणि पादचाऱ्यांना मोठा त्रास सहन करावा लागत होता, तसेच अनेक अपघातही घडले होते. प्रशासनाच्या दिरंगाईबद्दल नागरिकांनी तीव्र नाराजी व्यक्त केली होती. या पार्श्वभूमीवर, आयुक्त अभिनव गोयल यांच्याकडे वारंवार केलेल्या पत्रव्यवहारानंतर प्रशासनाने अखेर कामांना गती दिली आहे.

लवकरच इतर भागातही कामे सुरू
सध्या श्री मलंग रोड येथे दुरुस्तीचे काम सुरू झाले आहे. याशिवाय चिंचपाडा, यू-टाईप आणि नांदिवली परिसरातही लवकरच रस्ते दुरुस्तीची कामे सुरू होणार आहेत. दीर्घ प्रतीक्षेनंतर सुरू झालेल्या या दुरुस्तीमुळे दैनंदिन वाहतुकीतील त्रास कमी होईल, अशी अपेक्षा स्थानिक नागरिक आणि प्रवासीवर्गाकडून व्यक्त केली जात असून, त्यांनी या निर्णयाचे स्वागत केले आहे.