कुर्ला स्थानकात  सिग्नल यंत्रणेत बिघाड
मध्य रेल्वे वाहतुकीचे वाजले तीन तेरा; प्रवाशांचे हाल

सकाळ वृत्तसेवा
मुंबई, ता. ८ ः कुर्ला रेल्वेस्थानकात सिग्नल बिघाडामुळे बुधवारी (ता. ८) दुपारी लोकल सेवा विस्कळित झाली.  त्यामुळे अप-डाऊन हार्बर आणि मध्य रेल्वेच्या अप जलद मार्गावरील लोकल सेवा खोळंबल्या. तब्बल १५ मिनिटे लोकल वाहतूक विस्कळित राहिल्याने प्रवाशांचे हाल झाले आहेत. 
मिळालेल्या माहितीनुसार, बुधवारी चार वाजून सहा मिनिटांच्या सुमारास कुर्ला स्थानकाजवळ सिग्नल यंत्रणेत तांत्रिक बिघाड झाला. त्यामुळे सीएसएमटी ते पनवेल, वाशी अप-डाऊन  दिशेने जाणाऱ्या हार्बर मार्गावरील लोकल सेवा  आणि सीएसएमटीकडे जाणाऱ्या अप जलद मार्गावरील लोकल वाहतूक खोळंबली. त्यामुळे लोकल गाड्यांमध्ये प्रवासी अडकून पडले.  या घटनेची माहिती मिळताच मध्य रेल्वेचे अभियांत्रिकी पथक घटनास्थळी दाखल झाले. अवघ्या १५ मिनिटांत हा बिघाड दुरुस्त करण्यात आला आहे. दुपारी चार वाजून २१ मिनिटांनी रेल्वे वाहतूक पूर्ववत करण्यात आली; मात्र  या घटनेमुळे रेल्वेस्थानकांवर प्रवाशांची गर्दी उसळली. तसेच हार्बर आणि मुख्य मार्गावरील अप जलद लोकल सेवांवरसुद्धा या बिघाडाचा परिणाम झाला. या घटनेने हार्बर मार्गावरील वेळापत्रक कोलमडले. त्याचा परिणाम या मार्गावरील सेवांवर सायंकाळपर्यंत दिसून आला होता.