भुयारी मेट्रोला टाटाची ‘पाॅवर’
मुंबई, ता. ८ : मेट्रो-३ च्या वरळी अचार्य अत्रे चौक ते कफ परेड या भुयारी मेट्रो मार्गिकेच्या अखेरच्या टप्प्याचे बुधवारी (ता. ८) पंतप्रधान नरेंद्र मोदी यांच्या हस्ते लोकार्पण झाले असून, हा मार्ग गुरुवारपासून सेवेत येणार आहे. या संपूर्ण मेट्रो मार्गिकेला टाटा पाॅवरकडून वीज पुरवली जाणार आहे. दररोज सुमारे ४० मेगावाॅट एवढी वीज पुरवण्याची व्यवस्था टाटा पाॅवरने केली असून, त्याकरिता तीन ठिकाणांहून वीजजोडणी देण्यात आली आहे. टाटा पाॅवरकडून मुंबई मेट्रो-३ च्या ३३ किलोमीटरच्या कॉरिडॉरसाठी धारावी, महालक्ष्मी आणि साकी येथील रिसीव्हिंग स्टेशनमधून ११० केव्ही लाइनद्वारे वीजपुरवठा केला जात आहे. त्यासाठी ड्युअल बसबार प्रणालीद्वारे अखंडित वीजपुरवठा निश्चित केला आहे. भुयारी मेट्रोची सर्व स्थानके वातानुकुलित असून, येथील विद्यूत उपकरणे, स्वयंचलित जिने आणि मार्गिकेच्या टनेलमध्ये दिव्यांची व्यवस्था असल्याने येथे मोठ्या प्रमाणात विजेचा पुरवठा करावा लागत आहे. दरम्यान, टाटा पाॅवरकडून सध्या मेट्रो-१ ला आठ मेगावॉट वीजपुरवठा केला जात असून, रेल्वेलाही विजेचा पुरवठा केला जात आहे.