कारमधून नऊ लाखांची रोख रक्कम लंपास
नवी मुंबई, ता. ८ (वार्ताहर) : नवी मुंबईतील वाशी परिसरात इनऑर्बिट मॉलजवळच्या पे ॲन्ड पार्कमध्ये उभ्या एका टोयोटा इनोव्हा कारची काच फोडून नऊ लाख रुपयांची रोकड चोरली. ही घटना मंगळवारी (ता. ७) उघडकीस आली. वाशी पोलिसांनी या चोरट्यांविरोधात गुन्हा दाखल करून त्यांचा शोध सुरू केला आहे.
रियल इस्टेट व्यावसायिक अक्षय बागल (वय ३२) हे मंगळवारी सायंकाळी ७.१० वाजण्याच्या सुमारास कामानिमित्त वाशीत आले होते. त्यांनी आपली कार पे ॲन्ड पार्कमध्ये लावली होती. अवघ्या २५ मिनिटांत अज्ञात चोरट्यांनी त्यांच्या कारच्या उजव्या बाजूच्या मधल्या दरवाजाची काच फोडली आणि कारमधील मधल्या सीटवरील नऊ लाख रुपयांची रोख रक्कम असलेली ग्रे रंगाची टिफिन बॅग लंपास केली. काही वेळाने अक्षय परतल्यावर त्यांना ही चोरी लक्षात आली. त्यांनी तातडीने वाशी पोलिसांना माहिती दिली. वाशी पोलिसांनी या अज्ञात चोरट्यांविरोधात गुन्हा दाखल केला असून, परिसरातील सीसीटीव्ही कॅमेऱ्यांच्या मदतीने चोरांचा शोध सुरू केला आहे.