शिवसेनेकडून पूरग्रस्त कुटुंबांसाठी दिवाळी भेटवस्तू

मुंबई, ता. ८ : राज्यातील अनेक जिल्ह्यांना पावसाने झोडपले असून, पूरग्रस्त भागातील नागरिकांचे जनजीवन विस्कळित झाले आहे. विशेषतः मराठवाडा, उत्तर महाराष्ट्र आणि सोलापूर जिल्ह्यात आलेल्या विनाशकारी पुरामुळे अनेक कुटुंबांनी त्यांचे घर, पशुधन, पिके आणि आवश्यक वस्तू गमावल्या आहेत. या कुटुंबीयांची दिवाळी गोड होण्यासाठी उपमुख्यमंत्री एकनाथ शिंदे यांच्या नेतृत्वाखाली जायंट्स वेल्फेअर फाउंडेशन (एनजीओ)कडून पूरग्रस्त कुटुंबीयांना दिवाळी भेटवस्तूंचे वाटप करण्यात येणार असल्याची माहिती शिवसेना प्रवक्त्या शायना एन. सी. यांनी बुधवारी (ता. ८) दिली. यामध्ये पूरग्रस्त कुटुंबीयांना ब्लँकेट, टॉवेल, साड्या, टी-शर्ट, साखर, पोहे, तूर डाळ, मीठ, भांडी आणि बरेच काही अशा आवश्यक घरगुती ३,००० हून अधिक दिवाळी भेटवस्तू असतील. या भेटवस्तूंचे पहिले दोन ट्रक गुरुवारी (ता. ९) सायंकाळी साडेपाच वाजता बिर्ला मातोश्री सभागृह, मुंबई येथून रवाना करण्यात येणार आहेत. या वेळी उपमुख्यमंत्री एकनाथ शिंदे, खासदार श्रीकांत शिंदे उपस्थित राहणार असल्याची माहिती देण्यात आली.