मुंबईतील प्रस्तावित १० टक्के पाणीकपात रद्द
सकाळ वृत्तसेवा
मुंबई, ता. ८ : महापालिकेस पाणीपुरवठा करणाऱ्या पिसे पांजरापूर येथील जलशुद्धीकरण केंद्रातील १०० किलो व्होल्ट विद्युत उपकेंद्रांमधील विद्युत मीटर अद्ययावत करण्याचे काम नियोजनानुसार मंगळवारी (ता. ७) ते गुरुवार (ता. ९) या कालावधीत दररोज दुपारी १२.३० ते ३.३० वाजेपर्यंत म्हणजेच अडीच तास केले जाणार होते. त्यापैकी मंगळवार व बुधवारी नियोजित कामकाज पूर्ण करण्यात आले आहे, मात्र गुरुवारी महावितरण कर्मचाऱ्यांनी संप पुकारल्यामुळे सदर कामकाज पुढे ढकलण्यात आले आहे. शहर विभागातील ए, बी, एफ दक्षिण आणि एफ उत्तर विभागात संपूर्ण कार्यक्षेत्रात तसेच पूर्व उपनगरातील एम पूर्व आणि एम पश्चिम विभागातील व पूर्व उपनगरातील एल विभाग (कुर्ला पूर्व), एन विभागात, विक्रोळी, घाटकोपर व घाटकोपर पूर्व, एस विभागात भांडुप, नाहूर, कांजूरमार्ग आणि विक्रोळी पूर्व आणि टी विभागात मुलुंड पूर्व आणि पश्चिम क्षेत्रातील यापूर्वी प्रस्तावित केलेली १० टक्के पाणीकपात रद्द करून पाणीपुरवठा सुरळीत ठेवण्यात येणार आहे.