रस्त्यावर सांडलेल्या तेलामुळे वाहतूक धोक्यात
सकाळ वृत्तसेवा
ठाणे,(ता.११) : गोकुळ नगर, जरीमरी मंदिराजवळील रस्त्यावर अनोळखी वाहनामधील मोठ्या प्रमाणात ऑईल सांडले होते. हा प्रकार शनिवारी सकाळी घडल्याने त्याचा वाहतुकीवर परिणाम झाला. तातडीने त्या ऑईलवर माती पसरून तो रस्ता वाहतुकी मोकळा करण्यात आला. सुदैवाने यामध्ये कोणालाही दुखापत झाली नसल्याची माहिती ठाणे महापालिका आपत्ती व्यवस्थापन कक्षेने दिली. शनिवारी सकाळी पावणे अकरा वाजण्याच्या सुमारास गोकुळ नगर येथील रस्त्यावर ऑईल सांडले आहे. त्याचा वाहतुकीवर परिणाम होत असून त्यावरून जाताना वाहने घसरण्याची दाट शक्यता आहे. अशी माहिती दक्ष नागरिक राज चौधरी यांनी ठाणे महापालिका आपत्ती व्यवस्थापन कक्षेला फोनवरून दिली. माहिती मिळताच घटनास्थळी आपत्ती व्यवस्थापन कक्षाच्या कर्मचाऱ्यांनी धाव घेत, सांडलेल्या ऑईलवरती माती पसरल्यानंतर तो रस्ता वाहतुकीसाठी तातडीने मोकळा करून दिला. दरम्यान या घटनेत कोणालाही दुखापत झाली नसल्याची माहिती ठामपा आपत्ती व्यवस्थापन कक्षेने दिली.