वंदे भारत एक्स्प्रेसमध्ये दिव्यांग प्रवाशांसाठी नवी आधुनिक सुविधा
स्वयंचलित दरवाजे, ब्रेल लिपीतील फलकाची व्‍यवस्‍था
सकाळ वृत्तसेवा
मुंबई, ता. ११ : मुंबई-गांधीनगर वंदे भारत एक्स्प्रेस आता दिव्यांग प्रवाशांसाठी अधिक सुलभ आणि सोयीस्कर बनली आहे. भारतीय रेल्वेने या गाडीत व्हीलचेअर वापरणाऱ्यांसाठी रॅम्प, स्वयंचलित दरवाजे, हँडरेल, तसेच ब्रेल लिपीतील फलक अशा आधुनिक सुविधा उपलब्ध करून दिल्या आहेत. या उपक्रमातून सर्व प्रवाशांसाठी समान आणि सन्मानजनक प्रवासाचा अनुभव देण्याचा रेल्वेचा प्रयत्न दिसून येतो.
पश्चिम रेल्वेचे मुख्य जनसंपर्क अधिकारी विनीत अभिषेक यांनी दिलेल्या माहितीनुसार, व्हीलचेअर वापरणाऱ्या प्रवाशांसाठी विशेष रॅम्प आणि विस्तृत प्रवेशद्वारांची सोय करण्यात आली आहे. गाडीत चढताना आणि उतरताना मदत व्हावी, यासाठी विशिष्ट संरचना तयार करण्यात आली आहे. संबंधित दरवाजांवर दिव्यांग चिन्हही लावण्यात आले असून, कोचमध्ये व्हीलचेअर ठेवण्यासाठी विशेष जागा बसवण्यात आले आहेत. प्रवाशांच्या सोयीसाठी प्रत्येक कोचमध्ये वाहून नेण्यायोग्य उतरणपट्टी ठेवण्यात आली आहे. तसेच दृष्टिबाधित प्रवाशांना मदत व्हावी, यासाठी सीट क्रमांक, प्रवेशद्वार आणि शौचालयांवर ब्रेल लिपीतील फलक लावण्यात आले आहेत.
 विनीत अभिषेक म्हणाले, या सुविधांमुळे वंदे भारत एक्स्प्रेस सर्व प्रवाशांसाठी खऱ्या अर्थाने समावेशक आणि सुलभ बनली आहे. भारतीय रेल्वे सर्वांसाठी समान आणि सन्मानजनक प्रवासाचा अनुभव देण्यास कटिबद्ध आहे. या सुधारणा म्हणजे फक्त सुविधा नव्हे, तर रेल्वे प्रवास अधिक मानवी आणि संवेदनशील करण्याचे पाऊल आहे. वंदे भारत एक्स्प्रेस आता केवळ वेग आणि आरामाचे नाही, तर समावेशकतेचेही प्रतीक ठरली आहे.