सामाजिक संदेश देणारी लौजी येथील पुरातन विहीर
खोपोली पोलिस ठाण्याचे वरिष्ठ निरीक्षक हिरे यांची सदिच्‍छ भेट
खोपोली, ता. १२ (बातमीदार) ः खोपोली नगरपालिका हद्दीतील निसर्गरम्य लव्हे उर्फ लौजी या गावात १९३० रोजी बांधलेली ब्रिटिशकालीन विहीर आजही सामाजिक सलोख्याचा अनोखा संदेश देत उभी आहे. या विहिरीवर कोरलेला “विहीर सर्वांसाठी खुली” हा संदेश आजच्या युगातही समानता आणि बंधुभावाचे प्रतीक ठरतो. सुमारे शंभर वर्षांपूर्वीही या गावातील नागरिकांनी जात-पात विसरून सामाजिक एकतेचा धडा जगाला दिला होता, हे या विहिरीवरून स्पष्ट होते.
लौजी गावाची आणखी एक वैशिष्ट्यपूर्ण बाब म्हणजे, गावात कोणताही वाद निर्माण झाल्यास ग्रामस्थ परस्पर संवादातून मंदिरात एकत्र येऊन तो मिटवतात. गावातील या सलोख्याची आणि आदर्श पद्धतीची माहिती मिळाल्यानंतर खोपोली पोलिस ठाण्याचे वरिष्ठ निरीक्षक सचिन हिरे यांनी नुकतीच लौजी गावाला भेट देवून ग्रामस्‍थांची संवाद साधला. त्यानंतर त्यांनी मंदिरातील जीर्णोद्धाराची पाहणी केली. यावेळी उपस्थित ज्येष्ठ ग्रामस्थांच्या हस्ते हिरे यांचा शाल, श्रीफळ व स्मृतिचिन्ह देऊन सत्कार करण्यात आला. ग्रामस्थांनी गावातील सामाजिक ऐक्य आणि परंपरेचा अभिमान व्यक्त केला. काही वर्षांपूर्वी खालापूरचे तहसीलदार आणि तत्कालीन पोलिस निरीक्षकांनीही या विहिरीला भेट दिल्याचे ग्रामस्थांनी सांगितले. लौजी गाव हे आजही सामाजिक एकतेचे जिवंत उदाहरण ठरले असून, ब्रिटिशकालीन या विहिरीवरील अस्पृश्यतेविरोधातील संदेश आगामी पिढ्यांसाठी प्रेरणादायी ठरत आहे.