दिवाळीसाठी पश्चिम रेल्वेच्या विशेष गाड्यांच्या १३० फेऱ्या

सकाळ वृत्तसेवा
मुंबई, ता. १२ : दिवाळी आणि छटपूजेच्या पार्श्वभूमीवर गावी जाणाऱ्या प्रवाशांची वाढती गर्दी लक्षात घेऊन मध्य रेल्वेनंतर पश्चिम रेल्वेनेदेखील तीन मेल-एक्स्प्रेस गाड्यांच्या एकूण १३० उत्सव विशेष फेऱ्या चालवण्याचा निर्णय घेतला आहे. या गाड्या मुंबई सेंट्रल-शकूर बस्ती, वांद्रे टर्मिनस-गांधीधाम आणि साबरमती-हरिद्वार या मार्गांवर धावणार आहेत. या गाड्यांचे आरक्षण १२ ऑक्टोबरपासून सर्व रेल्वे आरक्षण केंद्रांवर तसेच आयआरसीटीसीच्या संकेतस्थळावर सुरू झाले आहे.
पश्चिम रेल्वेने दिलेल्या माहितीनुसार, ट्रेन क्रमांक ०९००३/०४ मुंबई सेंट्रल-शकूर बस्ती एसी सुपरफास्ट उत्सव विशेष गाडी १५ ऑक्टोबर ते ३० नोव्हेंबरदरम्यान धावणार आहे. या गाडीच्या एकूण ९२ फेऱ्या असतील. ट्रेन क्रमांक ०९४७१/०९४७२ वांद्रे टर्मिनस- गांधीधाम साप्ताहिक सुपरफास्ट उत्सव विशेष गाडी १४ ऑक्टोबर ते ११ नोव्हेंबर या कालावधीत धावणार आहे. या गाडीच्या एकूण १० फेऱ्या असतील. ट्रेन क्रमांक ०९४२५/०९४२६ साबरमती- हरिद्वार द्विसाप्ताहिक एसी उत्सव विशेष गाडी १५ ऑक्टोबर ते ३० नोव्हेंबरदरम्यान धावणार आहे. या गाडीच्या एकूण २८ फेऱ्या असतील.