भिवंडी, ता. १२ (वार्ताहर) : जिल्हा परिषद व पंचायत समिती निवडणुकांचे पडघम वाजू लागले आहे. निवडणूक आयोगाच्या सूचनेनुसार भिवंडी तालुक्यातील २१ जिल्हा परिषद गट आणि ४२ पंचायत समिती गणांसाठी प्रारूप मतदार याद्या ८ ऑक्टोबरला जाहीर केल्या आहेत. या याद्या पाहण्यासाठी तहसील कार्यालयातील निवासी नायब तहसीलदार यांच्या दालनात व्यवस्था केली असून, राजकीय पक्ष आणि नागरिकांना त्यांचा लाभ घेता येणार आहे, अशी माहिती तहसीलदार अभिजित खोले यांनी दिली.
प्रारूप मतदार याद्यांवर आक्षेप आणि हरकती १४ ऑक्टोबरपर्यंत कार्यालयीन वेळेत दाखल करता येणार आहेत. संबंधितांनी आपल्या हरकती व दुरुस्ती अर्ज तहसील कार्यालयात निर्धारित वेळेत सादर करावेत, असे खोले यांनी सांगितले. पंचायत समिती क्षेत्रातील ४२ गणांमध्ये अनुसूचित जाती, अनुसूचित जमाती, मागास प्रवर्ग आणि महिलांसाठी राखीव जागांची सोडत येत्या सोमवारी (ता. १३) सकाळी ११ वाजता वऱ्हाळ देवी माता मंगल भवन, कामतघर येथे पार पडणार आहे. खोले यांनी नागरिकांना या सोडतीसाठी उपस्थित राहण्याचे आवाहन केले असून, निवडणुकीच्या पार्श्वभूमीवर प्रशासनाने आवश्यक तयारी सुरू केली आहे.