मुरबाड, ता. १२ (वार्ताहर) : शहरातील ठाणे जिल्हा मध्यवर्ती सहकारी बँकेतून पैसे काढून परतणाऱ्या वृद्धावर हल्ला करून चोरट्याने ५० हजार रुपयांची लूट केल्याची धक्कादायक घटना शुक्रवारी दुपारी अडीचच्या सुमारास घडली. या घटनेनंतर अवघ्या दोन तासांत मुरबाड पोलिसांनी गुन्हेगाराला जेरबंद केल्याने नागरिकांतून पोलिसांचे कौतुक होत आहे.
मडकेपाडा येथील कृष्णा रांजणे (वय ६०) यांनी बँकेतून ५० हजार रुपये काढले होते. ते बँकेच्या पायऱ्यांवरून उतरत असताना सोपान शेळके या तरुणाने त्यांना जोरदार धक्का देऊन पाडले आणि हातातील पैशांची पिशवी खेचून फरार झाला. रांजणे यांच्या डोक्याला गंभीर दुखापत झाल्याने ते रक्तबंबाळ झाले. ही घटना पाहणाऱ्या नागरिकांनी आरडाओरड केली; मात्र चोरटा पळण्यात यशस्वी झाला. घटनेची माहिती मिळताच वरिष्ठ पोलिस निरीक्षक दादासाहेब एडके यांनी घटनास्थळी धाव घेत तपासपथके तयार केली. पोलिसांनी दुकानांचे सीसीटीव्ही फुटेज तपासले असता, म्हसा परिसरातील आगाशी गावचा शेळके दिसून आला. त्याने मोबाईल बंद केल्याने तपासात अडचणी येत होत्या; परंतु पोलिसांनी कल्याण, बदलापूरसह विविध ठिकाणी पथके रवाना केली. अखेर पोलिसांना तो मुरबाडमधील एका चायनीज गाडीवर दिसला. पोलिसांनी सापळा रचून त्याला पकडले. या वेळी सहाय्यक पोलिस निरीक्षक सुनील बोलके, हवालदार दीपक हिंदुराव आणि रामदास शिंदे यांनी तत्परता दाखवत त्याला जेरबंद केले.