तिकिटासाठी पक्षश्रेष्ठींच्या भेटीगाठी
स्थानिक स्वराज्य संस्थांच्या निवडणुकांची मोर्चेबांधणी
सकाळ वृत्तसेवा
अलिबाग, ता. १२ ः रायगड जिल्हा परिषद आणि पंचायत समिती निवडणुकीसाठी महायुती, महाविकास आघाडीतील सर्वच पक्षांनी मोर्चेबांधणीला सुरुवात केली. गावातील नाक्यावर, चौकात निवडणुकांच्या चर्चा रंगू लागल्या असून उमेदवारीसाठी पक्षश्रेष्ठींच्या भेटीगाठींना जोर आला आहे.
राष्ट्रवादी अजित पवार गट, शिवसेना शिंदे गटातील नेत्यांमध्ये आरोप-प्रत्यारोप करण्यास सुरुवात झाली आहे. यापूर्वीच्या निवडणुकीतील उणीधुणी काढली जात असताना भाजपचे पदाधिकारी शांत बसून निवडणुका जाहीर होण्याची वाट पाहत आहेत. महायुतीविरोधात महाविकास आघाडीत मुख्य लढत होणार असल्याने शेकापचे जयंत पाटील, काँग्रेसचे महेंद्र घरत, ठाकरे शिवसेनेचे जिल्हाप्रमुख सुरेंद्र म्हात्रे यांच्यावर संपूर्ण मदार आहे; पण दुसरीकडे महाविकास आघाडीतील अनेक नेते महायुतीमध्ये दाखल झाले आहेत. त्यामुळे महायुतीची बाजू मजबूत असली तरी तिकीटवाटपावरून अंतर्गत बंडाळीला सामोरे जावे लागण्याची शक्यता वर्तवली जात आहे.
---------------------------------
उमेदवारीची उत्सुकता
निवडणुका जानेवारीत होणार असल्याने सर्व पक्षांच्या नेत्यांनी विविध सामाजिक उपक्रम, विकासकामे, शासकीय योजना, पारंपरिक सण, पक्षप्रवेश, सामाजिक माध्यमे, वैयक्तिक जनसंपर्कातून भेटीगाठी सुरू केल्या आहेत. तर पक्ष नेतृत्वाने जिल्हा परिषद आणि पंचायत समिती मतदारसंघातील कार्यकर्त्यांना कामाला लागण्याचे आदेश दिले आहे. त्यामुळे गुडघ्याला बाशिंग बांधलेल्या उमेदवारांपैकी कोणाला संधी मिळेल, याची उत्सुकता आहे.